گوتەبێژی وەزارەتی ئەوقاف و کاروباری ئایینی حکومەتی ھەرێمی کوردستان ئاشکرای کرد کە بۆ یەکەمجار لە ھەرێمی کوردستانەوە ڤیزا بۆ حاجیان دابین دەکرێت ئەوەش کێشەیەکی زۆری حاجیان چارەسەر دەکات.



نەبەز ئیسماعیل، گوتەبێژی وەزارەتی ئەوقاف و کاروباری ئایینی ڕاگەیاند: "ساڵانی ڕابردوو ڤیزای سعودییە بۆ حاجیانی ھەرێمی کوردستان لە وڵاتی سێیەم لێدەدرا بۆ ئەو مەبەستە پاسپۆرتەکانی حاجیان بۆ ئەو وڵاتانە دەگواسترانەوە،ئەوەش کاتێکی زۆری لە حاجیان دەگرت و کێشەیەکی زۆری بۆ دروست دەکردن".



گوتیشی: "خۆشبەختانە بۆ ئەمساڵ وڵاتی سعودییە بڕیاریدا کە لە عێراق ڤیزاکان دابینبکرێت ، ھاوکات ماوەی سێ ڕۆژە بۆ ئەو مەبەستە لیژنەیەکی وڵاتی سعودییە لە شاری ھەولێرن و دەیانەوێت بەماوەی دوو ھەفتە کارە تەکنیکی و پێویستییەکانی ئەو بابەتە چارەسەر بکەن".



بە گوتەی نەبەز ئیسماعیل بە پێدانی ڤیزا بە حاجیان لە ھەرێمی کوردستان،ئەرکی سەرشانی حاجیان کە پێشووتر لەسەریان قورس بوو کەمتر دەبێـتەوەو کاری چوون و ھاتنەوەشیان خێراتر دەبێت.

bas news -