قایمقامی شارۆچکەی چەمچەماڵ دەڵێ بەو هۆیەی دۆسیەی سێوان قادر(ئەو ئافرەتەی کە لە کۆتایی ساڵی ڕابردوو لە چەمچەماڵ لەگەڵ منداڵەکانی سووتا و گیانی لەدەست دا) لە سنوورەكەمان نەماوە، ئەگەر زانیاریشمان هەبێ حەقی پێدانیمان نییە.



ڕەمەك ڕەمەزان، قایمقامی چەمچەماڵ ڕاگەیاند: "هەر دۆسیەیەك كە دەچێتە دادگا بە فەرمانی كەس ناوەستێندرێت، لێژنەیەك لەلایەن وەزیری ناوخۆوە بۆ دۆسیەكە پێكهێندراوە، لەبەر هەستیاریی بابەتەكە و تێكنەچوونی شیرازەی كۆمەڵایەتی ،دۆسیەكە نێردراوە بۆ دادگای لێكۆڵینەوەی سلێمانی".



سەبارەت بە هەمان بابەت،سەركەوت ئەحمەد، گوتەبێژی پۆلیسی سلێمانی ڕاگەیاند: "ئەو پەڕاوە بە سیفەتی تەمیزی ئێستا لە دادگای تاوانەكانی سلێمانییە و كەسوكاری سێوان قادر داوای سەرلەنوێ دەستگیركردنەوەی ئەو ژنە دەكەن كە لە دۆسیەكەدا هەبوو و دواتر ئازاد كراوە".



ڕوونیشیكردەوە: "پەڕاو و گوتەکان زیاتر لە مانگێكە لە دادگای تەمیزە و هیچ شتێكی نوێی لەسەر نییە، بەڵام ئەگەر پەڕاوەکان بگەڕێنەوە، بڕیاری دادگا چی بێت ئێمە جێبەجێی دەكەین، هەروەها هەر زانیاری و بەڵگەیەكی نوێ لەلایەن كەسوكاری سێوان و پارێزەرەكانی هەبێت لەگەڵ دۆسیەكە هاوپێچی دەكەین".


شەوی یەكشەممە(١٦-١٢-٢٠١٨) لە یەکێک لە گەڕەکەکانی شارۆچکەی چەمچەماڵ ئافرەتێک بەناوی سێوان قادر لەگەڵ سێ منداڵی سووتان و منداڵەکانی دەستبەجێ گیانیان لەدەستدا و خۆیشی ڕۆژی(٢٤-١٢-٢٠١٨) گیانی لەدەست دا.

bas news -