ئێوارەی ئەمڕۆ فڕۆکە جه‌نگییه‌كانی تورکیا له‌ بۆردومانه‌ به‌رده‌وامه‌كانیاندا بۆ سه‌ر ناوچه‌ سنوورییه‌كانی هه‌رێمی كوردستان، دوو ئۆتۆمۆبێلی جۆری تۆیۆتا لاندكرۆزه‌ر و تۆیۆتا پیكاب هیلۆكسیان لە گوندی بەرد کوڕانی سەر بەناحیەی سەنگە سەر له‌ بناری قەندیل كرده‌‌ ئامانج، به‌گوێره‌ی زانیارییه‌كانی له‌ بۆردومانه‌كه‌دا ته‌واوی ئه‌ندامانی خێزانێك شه‌هید بوون، كه‌ له‌ 3 كه‌س پێكهاتبوون.

په‌یامنێری‌ کوردستان ۲٤ له‌ ناوچه‌كه‌ راگه‌یاند، بۆردوومانەکە بۆ سەر دوو ئۆتۆمبێلی جۆری تیۆتا مەرزیە و تیۆتا لاندکرۆزەر بووە و به‌ هۆیه‌وه‌ 3 كه‌س شه‌هید بوون، كه‌ له‌ دایك و باوك و منداڵێكیان پێهاتبوون.

پێشتریش عوسمان ئەحمد بەڕێوبەری کارگێڕی نەخۆشخانەی فێرکاری شەهیدانی قەڵادزێ ڕاگەیاندبوو، ئەمبوڵانس و تیمی فریاگوزاریمان لەسەر داوای خەڵك ناردووه‌تە شوێنی بۆردوومانەکە، بەڵام تائێستا نەگەڕاونەتەوە و نازانرێ زیانە گیانیەکان چەندە و چۆنە.

ئاماژەی بەوەشکرد ژووری نەشتەرگەری و تیمی پزیشکانمان بۆ حاڵەتی پێوست ئامادە کردووه‌.