هەشتەمێن كۆنگرێ تەندروستیێ یێن هەر چار پارچەیێن كوردستانێ هاتە كرن
د. نزار عسمەت رێڤەبەرێ گشتی یێ ساخلەمیا پارێزگەها دهۆكێ دیار كر: "نۆژدارێن باكوور و باشوور و رۆژهەلات و رۆژئاڤایێ كوردستانێ كۆنگرێ میزۆپۆتامیا یێ هەشتێدا ل پارێزگەها دهۆكێ پێشكدارن. دێ چەندین پێزانێن و سەربۆرێن نۆژداری دناڤبەرا نۆژدارێن هەر چار پارچەیێن كوردستانێ لێك هێنە گوهارتن بۆ خزمەتا گەل و وەلاتێ مە ب زمانێ كوردی. ئارمانج ژی ئەوە لێكگوهارتنا زانستێ تەندروستی یێ نۆژداری ب زمانێ كوردی بهێتە بەحسكرن. ئەڤە چەندین كۆنگرە هاتنە ئەنجامدان و مفایەكێ مەزن گەهشتیە نۆژداران دبوارێ نۆژداریا نوودا. ئەڤ سالە ژی ساخلەمیا پارێزگەها دهۆكێ دگەل زانكۆیا دهۆكێ بەرهەڤیێن مەزن بۆ ئەنجامدانا كۆنگرێ میزۆپۆتامیا یێ هەشتێ ل دهۆكێ كرینە.
د. عەبدولا جاسم رێكخەرێ گشتی یێ كۆنگرێ تەندروستی یێ میزۆپۆتامیا یێ هەشتێ ل دهۆكێ دیار كر: "هژمارەكا نۆژدار ژ ئەوروپا وسوید ونەمسا وئەلمانیا بەرهەڤ بووینە د كۆنگرێ میزۆپوتامیا یێ تەندروستی هەشتێ دا. هەتا نۆكە پێنچ كۆنگرە ل توركیا هاتینە گێران، دوو كۆنگرە ژی ل هەرێما كوردستانێ هاتیە كرن. ئەڤە كۆنگرێ سیێ یە ل هەرێما كوردستانێ دهێتە رێڤەبرن".
ئاشكەرا كر: "ئەڤرۆ پشتی كۆنگرە ب دووماهی دهێت دێ بریار هێـتە دان كا سالا بهێت ل كیژ باژێرێ كوردستانێ بیت. ئەم دێ هەولدەن سالا بهێت ل پایتەختێ هەرێما كوردستانێ بهێتە دەستنیشانكرن وسالا بهێت ل هەولێر كۆنگرێ میزۆپۆتامیا بهێتە ئەنجامدان".
باسنيوز
