لایەنە سیاسییە کوردستانییەکانی کەرکووک بە مەبەستی چارەسەری کێشەی کەرکووک و ئاساییکردنەوەی دۆخی ئەو شارە، سەرجەم سەرۆک فراکسیۆنەکانەکانی هەردوو پەرلەمانی کوردستان و عێراقیان بانگهێشتی کەرکووک کردووە.

کازم سابیر، بە نوێنەرایەتیی لایەنە سیاسییە کوردستانیەکان لە کەرکووک سەردانی پەرلەمانی کوردستانی کردووە و لە پرێس کۆنفرانسێکدا رای گەیاند: "لە دوایەمین کۆبوونەوەی لایەنە سیاسییە کوردستانییەکانی کەرکووک بڕیار درا بانگهێشتی سەرجەم سەرۆک فراکسیۆنەکانی پەرلەمانی کوردستان بۆ کەرکووک بکرێت بۆ گفتوگۆکردن لەسەر ئاساییکردنەوەی دۆخی ئەو پارێزگایە".

گوتیشی: "ھاتووینەتە پەرلەمان لێرەوە بانگهێشتی سەرۆک فراکسیۆنەکانی پەرلەمان دەکەین بێنە کەرکووک و بە چاوی خۆیان بارودۆخی ئەمنی و سیاسیی شارەکە ببینن و رۆڵیان ھەبێت لە ئاساییکردنەوەی بارودۆخی ئەو شارەدا".

کازم سابیر گوتشی: "بەم نزیکانە شاندێک بە نوێنەری لایەنە سیاسییەکان دەچێتە پەرلەمانی عێراق و ھەمان بانگهێشتنامە بۆ سەرۆک فراکسیۆنەکانی پەرلەمانی عێراقیش دەکات کە سەردانی کەرکووک بکەن".

لەبارەی بارودۆخی ئەمنیی کەرکووک گوتی: "بارودۆخەکە ناسەقامگیرە و دەبێت کێشەکانی ئەو پارێزگایە کۆتاییان پێ بھێنرێت".










باسنيوز