ڕاوێژکارێکی مەکتەبی سیاسیی پارتی دیموکراتی کوردستان ئاشکرای کرد، مەسرور بارزانی بە سەرۆکایەتیی شاندێک، سەردانی لایەنەکان دەکات.



عارف روشدی، ڕاوێژکاری مەکتەبی سیاسیی پارتی ڕاگەیاند: مەسروور بارزانی شاندێک پێکدەھێنێت کە زۆرتر ستافێکی حکوومەت دەبێت، سەردانی حزبەکان دەکات، یەکەم لایەن کە سەردانی بکات یەکێتی نیشتیمانی کوردستانە و دواتر بزووتنەوەی گۆڕان و لایەنە پێکھاتەکان.



ڕاوێژکارەکەی مەکتەبی سیاسیی پارتی داوای لە لایەنەکان کرد، ناوی کاندیدەکانیان ئامادە بکەن و ڕای گەیاند: ”ھەر حزبێکیش کاندیدی بۆ پۆستەکان ئامادە نەبێت، کابینە حکوومییەکە دروست دەکرێت و شوێنەکانیان بە بەتاڵی دەمێنێتەوە تا خۆیان یەکلا بکەنەوە، بەڵام باوەڕ ناکەین گرفت لەو بارەوە ھەبێت و پێش ماوەی دیاریکراوی خۆی، مەسرور بارزانی کابینەی نوێی حکوومەت پێکدەھێنێت“.



دوێنێ سێشەممە ١١ی ٦ی ٢٠١٩، مەسرور بارزانی بە فەرمی لەلایەن پەرلەمانی کوردستان و بە دەنگی ٨٧ ئەندامی پەرلەمان لە کۆی ٩٧ پەرلەمانتاری ئامادەبوو لە کۆبوونەوەکەی پەرلەمان، بۆ پێکهێنانی کابینەی نوێی حکوومەت ناوزەد کرا.




باسنیوز