لاهوور جەنگی، یەکێک لە سەرانی خیانەتی ١٦ی ئۆکتۆبەری نێو یەکێتیی نیشتمانیی کوردستان، هەڕەشە لەو کەسانە دەکات کە باسی خیانەتەکەی دەکەن.

ئەمڕۆ شەممە ١ی حوزەیرانی ٢٠١٩، لاهوور جەنگی، یەکێک لە سەرانی خیانەتی ١٦ی ئۆکتۆبەر، سەردانی کەرکووکی کرد و لە لێدوانێکیدا بۆ کەناڵی (گەلی کوردستان)ی سەر بە حزبەکەی، هەڕەشەی لە هەر کەسێک کرد کە بە ئەنجامدانی خیانەتی ١٦ی ئۆکتۆبەر تۆمەتباری بکات.

لاهوور جەنگی شێوازێکی بازاڕی لە هەڕەشەکردنەکەدا بەکار هێنا و ڕای گەیاند کە هەر کەسێک بڵێت لاهوور جەنگی لە ١٦ی ئۆکتۆبەردا خیانەتی کردووە، ”جووتێک قۆنەرەی لاستیکی دەخەمە دەمی“.

لەمبارەیەوە هەڵوێست میرانی، پارێزەر و چالاکوان، وەڵامی قسەکانی لاهوور جەنگی داوەتەوە و ڕای گەیاندووە: ”بە ھاش و ھوش و ھات و ھاوار و جنێودان، نە مێژوو دەشێوێندرێ، نە ڕاستییەکان دەشاردرێنەوە“.

ڕوونیشی کردووەتەوە کە کەس بەبێ بەڵگە قسە ناکات، ”بەیاننامەکەی کۆسرەت ڕەسووڵ، دانپێدانانی پاڤڵ تاڵەبانی و دان نان بە ھەڵەکانی خۆت لە زاری خۆت، دەستێک دۆمینە و تاوڵەکانی ئاراس جەنگی، دیمانەکانی نەجمدین کەریم، دەستخۆشیەکانی عامری و مالیکی و عەبادی، ئەمانە ھەمووی لە لاپەڕەکانی مێژوودا تۆمار کراون و تەنھا بە دوو سێرچی ئینتەرنێت ھەموو دەکەونە بەرچاو“.

پێشتریش لاهوور جەنگی لەنێو خەڵکی کەرکووکدا بیری چووبوو کە کەرکووکیان ڕادەستی عەرەبە شۆڤێنییەکان کردووە و جنێوی بە ڕاکان جبووری، پارێزگاری ناشەرعیی کەرکووک کردبوو، بەڵام دواتر هەر خۆیان لەگەڵ ڕاکان جبووری ڕێککەوتنێکی نهێنییان ئەنجام دا و تەنانەت تیرۆریستەکانیشیان لە پێناو ڕازیکردنیان ئازاد کرد.











باسنيوز