لە ناحیەی حاجیاوای سەر بە قەزای رانیە، دوو کەس بە تۆمەتی دزیکردن لە مزگەوت دەستگیر کران. ھێزەكانی پۆلیس ئاماژە بۆ ئەوە دەكەن، كە دەرگای مزگەوتیان دزیوە و ددانیان بە تاوانەکەیاندا ناوە.

بەڕێوەبەرایەتیی پۆلیسی راپەڕین لە راگەیەندراوێكدا ئاشكرای كرد: "دوای ئەوەی هەواڵدەرێک سەردانی بنکەی پۆلیسی ماکۆکی کرد لە ناحیەی حاجیاوا و رایگەیاند، کە دزیی لە مزگەوتی گۆڕستانی گشتی حاجیاوا کراوە، دەرگاکانی مزگەوتەکە و هەندێک کەلوپەلی ئاسنی مزگەوتەکە لێ کراونەتەوە. دەستبەجێ رێکاری یاسایی گیرایەبەر و مەلەفی لێکۆڵنەوە کرایەوە و بڕیاری دادوەر بەدەست هات بۆ دۆزینەوە و دەستگیرکردنی تۆمەتباران".

پۆلیسی راپەڕین، ئاماژەی بەوە كردووە: "دوای هەوڵدان و بەدواداچوون لەلایەن هێزەکانمان لە بنکەی پۆلیسی ماکۆک، دوو کەس دەستگیرکران، کە هەردووکیان تەمەنیان لە خوار 18 ساڵە و لە رەگەزی نێرن و دانیشتووی ناحیەی حاجیاوان، لە بەردەمی پۆلیس و دادگا ددانیان ناوە بە تاوانەکەیان، کە هەستاون بە لێکردنەوەی دەرگاکانی مزگەوتی گشتیی گۆڕستانی حاجیاوا و هەندێک کەلوپەلی ئاسنیان بردووە و دواتر فرۆشتویانە".

بە گوێرەی راگەیەندراوەكە: "هەردوو تۆمەتبارەکە بە بڕیاری دادوەر و بەپێی مادەی 444 لە یاسای سزادانی عێراقی، راگیراون و لێکۆڵینەوە لەگەڵیاندا بەردەوامە".

K24-