رێڤەبەرێ‌ گشتیێ‌ كارەبا پارێزگەها دهۆكێ‌ راگەهاند، ئەو ئاریشا ل زڤستانا ئەڤ سالە د كارەبا پارێزگەها دهۆكێ‌ دا پەیدابووی ژلایێ‌ حوكمەتا هەرێما كوردستانێ‌ ڤە هاتە چارەسەركرن و پرۆژەیێ‌ نوو دێ‌ دەستپێ‌ كەت.

ئەندازیار كەمال محەمەد سالح دیار كر، بریارا نێچیرڤان بارزانی ب تەرخانكرنا 15 ملیۆن دۆلاران بۆ چارەسەركرنا كێشەیا كارەبا دهۆكێ‌ و هندەك پارێزگەهێن دی یا چاڤەرێكری بوو و هەر زوو بریارا وی دێ‌ هێتە بجهئینان و پرۆژەیێ‌ نوو یێ‌ كارەبا دهۆكێ‌ كو دێ‌ بیتە ئەگەرێ‌ چارەسەركرنا كێشەیا كارەبا دهۆكێ‌ یا زڤستانا ئەڤ سالە دێ‌ دەستپێ‌ كەت و تەندەر دهێتە چێكرن و هەر زوو دێ‌ كۆمپانیەك دەست ب ئەنجامدانا ڤی پرۆژەی كەت.

رێڤەبەرێ‌ گشتیێ‌ كارەبا پارێزگەها دهۆكێ‌ ئاماژە ب هندێ‌ ژی دا كو ب رێیا ڤی پرۆژەیێ‌ نوو یێ‌ كارەبێ‌، دێ‌ بیتە ئەگەر كا بەهرا دهۆكێ‌ ژ تۆرا كارەبا گشتی چەندە دروست ب گەهیت و دێ‌ هێلەكا كارەبێ‌ بۆ دهۆكێ‌ هێتە كێشان ب كۆژمێ‌ 9 ملیۆن و 825 هزار دۆلاران و دێ‌ 38 كیلۆمەتران یا درێژ بیت و دێ‌ شێت 400 مێگاواتێن كارەبێ‌ بۆ دهۆكێ‌ كێشیت.

ئاشكرا ژی كر كو ئەڤ سالە مەزنترین ئاریشا كارەبا دهۆكێ‌ نەبوونا سۆتەمەنیێ‌ و نەبوونا هێلەكا كارەبێ‌ یا باش دناڤبەرا هەولێر و دهۆكێ‌ دا بوویە و ب تنێ‌ 50 مێگاوات ژ وێستگەها بەرهەمئینانا كارەبا كواشێ‌ و 125 مێگاوات ژ وێستگەها بەرهەمئینانا كارەبا باعەدرێ‌ بوون و ئەڤ پرۆژەیێ‌ نوو دێ‌ بیتە ئەگەر كو ئاریشا كارەبا دهۆكێ‌ ب ئێكجاری چارەسەرببیت.

ئەندازیار محەمەد سالح ئەو یەك ژی نە ڤەشارت كو ئەڤ پرۆژەیێ‌ نوو رەنگە 50 سالان خزمەتا خەلكێ‌ دهۆكێ‌ بكەت.










باسنيوز