بەرێوەبەری ئاسایشی کەرکووک ئاشکرای کرد کە ئەگەر هەیە شەڕ لە نێوان کورد و عەرەب لە سنووری شارەدێی سەرگەڕانی سەر بە قەزای دوبز درووست ببێت.

پێش نیوەڕۆی ئەمڕۆ سێشەممە ١٤ی ئایاری ٢٠١٩، زیاتر لە ٢٠ بنەماڵەی عەرەب کە سەدان کەس دەبن و ئەوانەن کە کاتی خۆی ڕژێمی بەعس هێنابوونیە ناوچەکە، بە پاڵپشتیی هێزێکی زۆری مغاویری سەر بە سوپای عێراق، چوونەتە سەر گوندی (پەلکانە) و چەندان خانووی بەتاڵیان دەست بەسەردا گردووە.

لەمبارەیەوە عەمید ئیدریس رەفعەت، بەڕێوەبەری ئاسایشی کەرکووک ڕای گەیاند: ”لەسەر پرسی زەوی و زار، هەندێک عەرەب چوونەتەوە سنووری سەرگەڕان و کوردەکانیش کە زەویی موڵکی خۆیانە، ڕووبەڕوویان بوونەتەوە“.

هۆشداریشی لە بارەی ئەگەری سەر هەڵدانی شەڕ لە نێوان کورد و عەرەب لە سنووری سەرگەڕان دا و ڕای گەیاند: ”ئەم رەوشە پێویستی بە چارەسەر ھەیە“.

پەلکانە گوندێکی دەوروبەری ناحیەی سەرگەڕانە لە قەزای دوبزی پارێزگای کەرکووک، لای باکووری ڕۆژئاوای گوندەکەش ناحیەی دیبەگەی سەر بە قەزای مەخموورە.










باسنيوز