نوونەرێن كەمپا چیایێ شنگال داخازا ڤەگەراندنا دەزگەهێ خێرخوازی بارزانی دكەن
پیر دەیان، بەرپرسێ ئۆفیسا دەزگەهێ خێرخوازی بارزانی ل قەزا شنگال دیاركر: "هەتا نۆكە ب فەرمێ چەكدارێن رێگری ل دەزگەهێ خێرخوازی بارزانی ل چیایێ شنگال كرین داخازا لیبۆرینێ نەكرینە، هەتا داخوازا لیبۆرینێ ژ مە نەكەن ئەم بەرهەڤ نینن ڤەگەرینە شنگال چونكو دەمێ چەكداران ئەم ل شنگال دەستەسەركرین برینە خانەسۆری و ڤەكۆلین دگەل مە ئەنجامدان. نۆكە ژی مە باوەری نەمایە ڤەگەرینە شنگال ژبەر وان گرۆپێن چەكدار كو دەزگەهێ خێرخوازی بارزانی ل چیایێ شنگال هاریكاریێن مرۆڤایەتی ل سەر ئاواران وخەلكێ هەژار و لێقەومایێن شنگالدا بەلاڤ دكرن لێ گرۆپێن چەكدار رێگری ل كارێ مە كرن".
خویا ژی كر: "بەری چەند رۆژان هژمارەكا ژ ئاوارێن چیایێ شنگال و موختارین دناڤ كەمپێ دا ل چیایێ شنگال خرڤەبوونەك ئەنجامدان و داخازا ڤەگەریانا دەزگەهێ خێرخوازی بارزانی دكەن چونكو ئاوارێن چیایێ شنگال زۆر پێدڤی ب هاریكاریێن مرۆڤی هەنە".
باسنيوز
