بڕیارێکی سەرۆک وەزیرانی پێشووی عێراق لە دژی گەلی کوردستان هەڵدەوەشێندرێتەوە.

نەدا عەنتەری، پەرلەمانتاری پیشووی عێراق رايگەیاند، راگرتنی پارەی گەنمی جووتیارانی هەرێمی کوردستان دووەم بڕیاری حەیدەر عەبادیی سەرۆک وەزیرانی عێراق (2014-2018) بوو.

لە سەردانەکەیدا بۆ بەغدا، شاندەکەی هەرێمی کوردستان و محەمەد هاشم ئەلعانی، وەزیری بازرگانیی عێراق کۆ بوونەتەوە و ئەلعانی بڕیاری داوە بڕیارەکەی عەبادی لە دژی پارەی گەنمی جووتیارانی کوردستان هەڵوەشێندرێتەوە.

نەدا عەنتەری ئاماژەی بەوەش کرد، کە بڕیارەکانی حەیدەر عەبادی، کە گرنگترینیان پارەی گەنمی جووتیارانی کوردستان، بڕینی بەشەبودجەی کوردستان و دانانی گومرگ لەسەر ئەو کەلوپەلانەی دەهاتنە کوردستان، نادەستووری بوون و بە میزاجی لە دژی هەرێمی کوردستان دراون.

د.ناسر ھەرکی، ئەندامی فراکسیۆنی پارتی دیموکراتی کوردستان لە پەرلەمانی عێراق رايگەیاند، بڕیارەکانی سەرۆک وەزیرانی پێشووی عێراق بە لێکتێگەیشتن و هەماهەنگیی هەولێر و بەغدا هەڵوەشێندراونەتەوە و ئێستاش ”چاوەروانی باشترکردنی پەیوەندیی ھەردوولا دەکەین“.












باسنيوز