ئەگەرچی بڕیار بوو لە کۆتاییی ئەمساڵدا پڕۆسەی ھەڵبژاردنەکانی ئەنجومەنی پارێزگاکانی عێراق بەڕێوە بچێت، بەڵام ئێستا نەک ھەر پێشبینی بەڕێوەچوونی ھەڵبژاردنەکان لە ئەمساڵدا ناکرێت، بەڵکو بەشێکی لایەنەکان لەگەڵ ھەڵوەشاندنەوەی ئەو ئەنجومەنانەن. نوێنەرێکی کوردیش دەڵێ، کۆمسیۆن بانگھێشتی پەرلەمان دەکرێت.



مەیادە محەمەد نەجاڕ، پەرلەمانتاری فڕاکسیۆنی پارتی لە پەرلەمانی عێراق دەڵێت: "تا ئێستا بۆمان ڕوون نییە کەی پڕۆسەی ھەڵبژاردنی ئەنجومەنی پارێزگاکانی عێراق بەڕێوە دەچێت و لایەنە عێراقییەکانیش لەسەر ئەو بابەتە بەسەر دوو بەرەدا دابەش بوون، کە ھەندێک لایەنی عێراقی لەگەڵ ئەوەدان ئەنجومەنی پارێزگاکانی عێراق نەمێنن و ھەندێکی دیکەش بەپێچەوانەوە لەگەڵ مانەوە و گرینگیدان بەو ئەنجومەنانەن."



پەرلەمانتارەکەی پارتی بۆ ماڵپەڕی فەرمیی پارتی دیموکراتی کوردستان گوتی: "بڕیار بوو کۆمسیۆنی باڵای ھەڵبژاردنەکانی عێراق بانگھێشتی پەرلەمان بکرێن، بەڵام تا ئێستا ھیچ بڕیارێکی فەرمیمان بەدەست نەگەیشتووە، ئایا ئەنجومەنی پارێزگاکان دەمێنن، یان نامێنن."



مەیادە محەمەد نەجاڕ ڕوونی کردەوە: "بڕیارە یاسای ھەڵبژاردنەکانی عێراق ھەموار بکرێتەوە و لەسەر بەڕێوەچوونی پڕۆسەی ھەڵبژاردنەکانی ئەنجومەنی پارێزگاکانیش، کۆمسیۆن بانگھێشتی پەرلەمانی عێراق دەکرێت، بەڵام ھێشتا کاتی بانگھێشتکردنیان بۆ کۆبوونەوەی پەرلەمان دیاری نەکراوە."




kdp-