شەوی ڕابردوو مایک پۆمپیۆ، وەزیری دەرەوەی ئەمەریکا بە سەردانێکی نھێنی گەیشتە عێراق و دوور لە چاوی میدیاکان لەگەڵ کاربەدەستانی عێراق کۆ بووەوە. پەرلەمانتارێکیش دەڵێ، سەردانەکە پێوەندیی بە ڕەوشی ئێستای ناوچەکەوە بووە.

سەردانی شەوی ڕابردووی وەزیری دەرەوەی ئەمەریکا بۆ عێراق، یەکەم سەردانی نھێنیی کاربەدەستانی وڵاتە یەکگرتووەکانی ئەمەریکا نییە و پێشتریش ئەمە ڕووی داوە. لەوبارەیەوە دانا جەزا، ئەندامی لیژنەی پەیوەندییەکانی پەرلەمانی عێراق دەڵێت: "ئێمە وەک پەرلەمان پێشتر زانیاریمان نەبوو دەربارەی ئەو سەردانەی وەزیری دەرەوەی ئەمەریکا و، تا نەگەڕایەوە، نەمانزانی سەردانی عێراقی کردووە و لەگەڵ سەرۆکوەزیران کۆ بووەتەوە."

ئەندامەکەی لیژنەی پەیوەندییەکانی پەرلەمانی عێراق بۆ ماڵپەڕی فەرمیی پارتی دیموکراتی کوردستان گوتی: "ھیچ حاڵەتێکی لەناکاو لە عێراق نەبووە و ھاووڵاتییانی عێراقی دڵنیا دەکەینەوە شتێک لە عێراق ڕووی نەداوە پێویستی بە سەردانی بەپەلەی ئەمەریکا ھەبێت."

دانا جەزا ڕوونی کردەوە: "ھەندێ ڕووداوی ناوچەکە بە جۆرێک لە جۆرەکان پەیوەندییان بە عێراقەوە ھەیە و ئەمە ناشاردرێتەوە، لەوانەش پەیوەندیی نێوان کۆماری ئیسلامیی ئێران و ئەمەریکا، ھەروەھا ڕەوشی ئاڵۆزی سووریا و پرسی سنوور، ئەمەش کاریگەریی کردووەتە سەر ڕەوشی عێراق، چەند پرسێکی دیکەش لە ڕۆژەڤدا هەن، وەک شەڕی بەرەنگاربوونەوەی داعش و ھەناردەکردنی نەوتی عێراق، کە ئەمانە پرسی گەرمی عێراقن و سەردانی پۆمپیۆش ھەر لەو چوارچێوەیەدا بووە."


kdp-