جڤاتا پارێزگەھا دھۆکێ ئەگەرێن کێمبوونا رێژەیا کارەبا دھۆکێ د ماوێ بۆری دا بۆ کێمبوونا سۆتەمەنیێ ڤەدگەرینن و ژ ئەگەرێ ھندێ ژی وێستگەھا سەرەکی یا کواشێ ژ سەرجەمێ ھزار مێگاواتێن رۆژانە ب تنێ 50 مێگاواتان بەرھەم دئینیت.

عەبدولسەمەد تێلی، سەرۆکێ لیژنا سۆتەمەنیێ ل جڤاتا پارێزگەھا دھۆکێ دیار کر، نەبوونا سۆتەمەنیێ بوویە ئەگەر کو وێستگەھێن بەرھەمئینانا کارەبێ ل پارێزگەھا دھۆکێ کارێ خوە یێ دروست نەکەن، ب تایبەت وێستگەھا بەرھەمئینانا کارەبێ ل کواشێ دشێت رۆژانە ب ھەر چوار یەکەیێن خوەڤە ھزار مێگاواتێن کارەبێ بەرھەم بینیت، بەلێ ژ بەر نەبوونا سۆتەمەنیێ رۆژانە ب تنێ 50 مێگاواتان بەرھەم دئینیت و ددەتە خەلکێ پارێزگەھا دھۆکێ و ل وێستگەھا باعەدرێ ژی 131 مێگاوات دھێنە بەرھەمئینان.

ئاشکرا ژی کر کو دەمێ کارەبا ل دھۆکێ نەھێتە بەرھەمئینان، پێدڤیە کارەب بۆ دھۆکێ ژ ھەولێرێ بھێت، بەلێ ئەو ھێلێن کارەبێ یێن دناڤبەرا دھۆک و ھەولێر دا ب تنێ شیانێن دابینکرنا 400 مێگاواتێن کارەبێ ھەنە و ئەڤە ژی تێرا پارێزگەھا دھۆکێ ناکەت و سەرەرای ھندێ ژی رێژەیەکا کارەبا دھۆکێ بۆ ئاوارە و دەڤەرێن نوو رزگارکری دچیت.

عەبدولسەمەد تێلی ئاماژە ب ھندێ دا کو مە خواستیە سۆتەمەنی بۆ وێستگەھێن بەرھەمئینانا کارەبێ ل پارێزگەھا دھۆکێ بھێنە دابینکرن و ئاریشا کارەبا گشتی ل دھۆکێ چارەسەرببیت.












باسنیوز