نزیکەی 10 هەزار دۆنم زەوی لە سنووری قەزای داقووق هەڕەشەی دووبارە داگیرکردنیان لەسەرە، جووتیارە کوردەکانی ئەو سنوورە کە قسەیان کردووە دەڵێن: سەدان ساڵە باب و باپیرانیان لەسەر زەوی و زاری خۆیان ژیاون, بەڵام ئەو عەرەبە هاوردانەی کە بە مەبەستی تەعریب لە سەردەمی ڕژێمی پێشوو هێنراونەتە ئەو گوندانە, ئێستا بە پشتگیری حەشدی شەعبی و هێزە عێراقییەکان و بە هاوکاری پارێزگاری سەپێنراوی کەرکووک, هەڕەشەی کووشتنیان لێدەکرێت و, جارێکی دیکە دەیانەوێت ئەو سنوورە تەعریب بکەنەوە.

بۆ نیشاندانی ناڕه‌زاییش به‌رامبه‌ر ئه‌و هه‌ڕه‌شانه‌ی لێیان ده‌كرێت، جووتیارانی كورد له‌ گوندی ئه‌نگیجه‌ی سه‌ر به‌ قه‌زای داقوق گردبوونه‌ویه‌كیان سازكرد، داوا لەبەرپرسانی کورد دەکەن، بە هانایانەوە بچن و ئاماژه‌ به‌وه‌ش ده‌كه‌ن، ته‌نیا مۆڵه‌تی هه‌فته‌یه‌كیان پێدراوه‌ بۆئه‌وه‌ی گونده‌كه‌یان چۆڵ بكه‌ن.

رووداوه‌كانی 16ی ئوكتۆبه‌ر و هێرشه‌كه‌ی حه‌شدی شه‌عبی نه‌ك ته‌نیا ده‌سه‌ڵاتی كوردی له‌ ناوچه‌ كوردستانییه‌كانی ده‌ره‌وه‌ی ئیداره‌ی هه‌رێم كه‌م كرده‌وه‌، به‌ڵكو هه‌نگاوه‌كانی دوای ئه‌و رووداوانه‌ به‌ره‌و گۆڕینی دیمۆگرافیای ئه‌و ناوچانه‌ ده‌ستیان پێكرا و له‌ماوه‌ی ساڵی رابردوودا له‌و ناوچانه‌ ده‌ست به‌ پرۆسه‌یه‌كی چڕ و به‌رده‌وامی ته‌عریبكردنی خاكی كوردستان كراوه‌ته‌وه‌.
k24-