پشتى ژبه‌ر چه‌كدارێن تیرورستێن داعش هه‌مو هاولاتیێن كورد شه‌به‌ك ل مووسل ئاواره‌ى هه‌رێما كوردستانێ بووى و ل ناڤ كه‌مپا ئاكنجیبووین ، پشتى ده‌شتا موسل هاتیه‌ڤ ئازادكرن، رێژه‌كا باش هاولاتیێن شه‌به‌ك زڤرینه‌ڤه‌ سه‌ر جهێن خوه‌ به‌لێ كه‌فت به‌ر گه‌ڤێن حه‌شدا شه‌عبى و په‌شیمانن ل زڤرینه‌ڤه‌یێ.

سالم جومعا شه‌به‌ك، نوێنه‌رێ كوردێن شه‌به‌ك ل ده‌شتا مووسڵ ، راگه‌هاند: ”رێژه‌كا باش یا كوردێن شه‌به‌ك ل هه‌رێما كوردستانێ ماینه‌و نه‌زڤرینه‌ ژبه‌ركو ره‌وشا ئه‌وێن ل ئاواره‌یێ زڤریه‌ڤه‌ گه‌له‌ك یا خرابه‌ ژ به‌ر چه‌كدارێن حه‌شدا شه‌عبى ،به‌رده‌وام گه‌ڤا ل موختارو هاولاتیێن شه‌به‌ك دكه‌ن ل ده‌شتا مووسل، داخوازێ لێ دكه‌ن كو مالێن خوه‌ باربكه‌ن. حه‌شدا شه‌عبى دبێژیت وان كو هوین لایه‌نگرو ئه‌ندامێن پارتى دیموكراتى كوردستانن پێدڤیه‌ نه‌میننه‌ ل ڤێره‌ بچنه‌ كوردستانێ! ئه‌وێ لایه‌نگرێ پارتى بیت توشى هه‌ره‌شا بوویه‌ ل ده‌شتا موسل ب ده‌ستێ حه‌شدا شه‌عبى. ره‌وشا ئه‌و شه‌به‌كێن زڤریه‌ڤه‌ گه‌له‌ك یا خرابه‌ و خه‌لكێ دئێشینن هه‌تا نۆكه‌ ئه‌ڤ ره‌وشه‌ وه‌ك خۆ مایه‌“.

ناڤبرى گۆتژى: ”هه‌تا نۆكه‌ رێژا 75% كوردێن شه‌به‌ك ل ئاواره‌یێ زڤرینه‌ڤه‌ سه‌ر جهێن خوه‌ ل ده‌شتا موسول، به‌لێ گه‌له‌ك ژوان په‌شیمان بووینه‌ڤه‌. ژبه‌ر ره‌فتارێن حه‌شدا شه‌عبى دگه‌ل وان رێژا 25% یا كوردێن شه‌به‌ك نۆكه‌ ل ناڤ كه‌مپا دژین ل هه‌رێما كوردستانێ و ئه‌گه‌ر خێزانه‌ك بخوازیت ل ده‌شتا مووسل جاره‌ك دى ئاواره‌ بیته‌ڤه‌ رێگریێ لێ ناكه‌ن به‌لێ گه‌له‌ك ب زه‌حمه‌ت خستیه‌ هه‌تا بشێت جاره‌ك دى ئاواره‌ بێته‌ڤه‌. ئه‌گه‌ر وه‌ك به‌رى نۆكه‌ ئه‌منیه‌تا ده‌ڤه‌رێ لێ بهێته‌ڤه‌ پێشمه‌رگه‌و هێزێن عیراقێ ب هه‌ڤرا ب رێڤه‌به‌ن. كه‌س چۆ ئاریشه‌ نینه‌ به‌لێ وه‌ك نۆكه‌ كه‌س نه‌شێت ل وێرێ بژیت“.










باسنيوز