لە نیوەی ئەمساڵەدا، گرووپی تیرۆریستی داعش لە چەند ناوچەیەكی عێراق سەری ھەڵداوەتەوە؛ بەرپرسێكی وەزارەتی پێشمەرگەیش زانیاریی ده‌دا كە لە ئێستادا داعش خۆی رێك دەخاتەوە و مەترسیشی لەسەر چەند ناوچەیەكی كوردستانی دروست كردووە.

لیوا قارەمان شێخ كەمال، جێگری سوپاسالاری وەزارەتی پێشمەرگە، ڕایگەیاند كە گرووپی تیرۆریستی داعش سوودی لەو بۆشاییە ئەمنییەی نێوان ھێزەكانی پێشمەرگە و ھێزە عێراقییەكان وەرگرتووە و دەڵێت: "ئێمە ئاگاداری جووڵەی تیرۆریستانی داعشین و بە وردی چاودێریی چالاكییەكانیان دەكەین، بەڵام نایشارینەوە چەكدارانی داعش سوودیان لەو سنوورانە بینیوە كە دەكەونە نێوان سەنگەرەكانی ھێزەكانی پێشمەرگە و ھێزە عێراقییەكان، بە ئاسانی داعش لەو نێوەندەدا ھاتوچۆ دەكات و چالاكییشیان ھەیە، بە داخەوە تا دێت چالاكیی گرووپی تیرۆریستیی داعش روو لە ھەڵكشانە".

جێگری سوپاسالاری وەزارەتی پێشمەرگە، بۆ ماڵپەڕی فەرمیی پارتی دیموكراتی كوردستان، گوتی: "چالاكیی تیرۆریستانی داعش لە ئێستادا بریتییە لە نانەوەی بۆمب و دانانی خاڵی وەھمی و ھەڵكوتانە سەر گوندنشینان، بە تایبەتی ئەوەی ئێمە مەبەستمانە و زیاتر چاودێری دەكەین، ناوچە كوردستانییەكانی دەرەوەی ئیدارەی حكوومەتی ھەرێمی كوردستانن".

لیوا قارەمان ئاماژەی دا: "تا ئەو ناوچانەی نێوانی پێشمەرگە و ھێزە عێراقییەكان بەو بۆشاییە بمێنێتەوە، رۆژ بە رۆژ رەوشی ئەمنیی ناوچە كوردستانییەكان بەرەو ئاڵۆزتر دەچێت، چونكە ھێزە عێراقییەكان توانای كۆنتڕۆڵكردنی سنوورەكەیان نییە و رێگریشن لە چوونی پێشمەرگە بۆ ئەو سنوورانە، پێمان وایە لە ئێستادا مەترسییەكی جیددیی داعش بۆ سەر ھەندێ ناوچەی كوردستانی ھەیە".

لەبارەی ژماره‌ی تیرۆریستانی داعش لە عێراق و ناوچە كوردستانییەكان، لیوا قارەمان گوتی: "ھەموو ئامارەكان پێشبینین، بۆ نموونە دەگوترێت ژمارەی تیرۆریستانی داعش لە سنووری پارێزگای نەینەوا ئەوەندەیە و لە تكریت ژمارەیەك دەگوترێت، بەڵام ئامارێكی دروست و فەرمی لە بەردەستدا نییە و تەنیا ئێمە زانیاریمان ھەیە، ژمارەیەكی زۆر ھێشتا ماون و مەزندەی زیادبوونیان دەكرێت".
kdp-