سەرۆکی فراکسۆنی پارتی لە ئەنجومەنى پارێزگای سلێمانی، ڕای دەگەیەنێت، ئەوانەی شانازى بە پارێزگاری سلێمانییه‌وه‌ دەکەن، با بەراوردێك لە نێوان پارێزگارەکەی خۆیان و پارێزگارى هه‌ولێر بکەن، ئه‌وكات دەزانن کامیان شیاوی سوکایەتی پێکردنە.

زیاد کاکە ڕەزا، سەرۆکی فراکسیۆنی پارتی لە ئەنجومەنی پارێزگای سلێمانی ڕايگەیاند: "ئەوەی قەڵەم بەدەستە یان ڕۆشنبیرە بابێن بەراوردێك لە نێوان پارێزگارەکەی سلێمانى کە شانازی پێوە دەکه‌ن، لەگەڵ نەوزاد هادی پارێزگارى هه‌ولێردا بکه‌ن، ئینجا با بزانین کامیان شیاوی ئەوەیە سوکایەتی پێبکرێت و کامیان شیاوی ئەوەیە ڕێزی لێ بگیرێت".

ئەو ئەندامەی ئەنجومەنی پارێزگای سلێمانی، گوتیشی: "ڕۆژ لە دواى ڕۆژ شتی نەشیاو دێتە ناو کۆمەڵگەی ئێمە، نەدەبوو ئەو هه‌ڵسوكه‌وتانه‌ى به‌رده‌م په‌رله‌مانى ئه‌ورووپا بکرایە".

ڕۆژى پێنجشەممە 22/2/2018، سێ هەڵسوڕاوی گۆڕان لەبەردەم بارەگای پەرلەمانی ئەورووپا، قسەی نەشیاویان ئاراستەی پارێزگای هەولێر کرد، بەو هۆیەوە لەلایەن دلاوەر ئاژگەیی، نوێنەری حکوومەتی هەرێمی کوردستان لە پەرلەمانی ئەورووپا وەڵام درانەوە و دواتر مشتومڕی زیاتر دروست بوو.









باسنيوز