قائیمقامێ قه‌زا شنگال راگه‌هاند كو وان پێنگاڤ پێنگاڤ داخواز ژ پارێزگارێ مووسل و جڤاتا مووسل كرینه‌ و خه‌لكێ شنگالێ ژی گه‌هاندیه‌ جڤاتا نوونه‌رێن عیراقێ بۆ هندێ پێشێلكاری ل سه‌ر شنگالێ نه‌مینن و خه‌لكێ شنگال ب خوه‌ ئیدارا خوه‌ بكه‌ت، به‌لێ هه‌تا نها چو به‌رسڤ بۆ داخوازیێن مه‌ و خه‌لكێ شنگالێ نینن.



مه‌حما خه‌لیل، قائیمقامێ قه‌زا شنگال ئه‌ڤرۆ رۆژا سێشه‌مبی 20/2/2018، د كۆنگره‌یه‌كێ رۆژنامه‌ڤانی دا ل پارێزگه‌ها دهۆكێ ئاشكرا كر، مه‌ ژ پارێزگه‌ها مووسل خواستیه‌ دانپێدان ب ده‌زگه‌هێن شنگالێ یێن فه‌رمی بهێته‌ كرن وه‌كو قائیمقام و رێڤه‌به‌رێن هه‌رچوار ناحیان و گۆت: هنده‌ك كه‌سێن نه‌قانوونی نها ل سه‌ر كورسیكێن شنگالێ روونشتینه‌ و پێدڤیه‌ ئه‌و كورسیكه‌ بهێنه‌ ڤالاكرن بۆ كه‌ساتیێن شه‌رعی.


ئاشكرا ژی كر كو پێدڤیه‌ ده‌زگایێن شنگال یێن فه‌رمی ده‌ست ب كاربن دا كو خه‌لكێ شنگالێ بشێت پشكداریێ د هه‌لبژارتنان دا بكه‌ت، چونكو هه‌تا نها 85% ژ خه‌لكێ شنگال د ژیانه‌كا سه‌خت دانه‌ و چاڤێ وان ل هندێ نه‌ جاره‌كا دی ڤه‌گه‌رنه‌ سه‌ر مال و مۆلكێن خوه‌ ئه‌وێن هاتینه‌ وێرانكرن و كاڤلكرن.









باسنيوز