ئەمڕۆ پێنجشەممە، پارێزگاری ھەولێر، لەبارەی ھێرشکردنە سەر چەند گەشتیارێکی عەرەب لەشاری ھەولێر، پرێس کۆنفرانسێکی ساز کرد.



نەوزاد ھادی، پارێزگاری ھەولێر، لە پرێس کۆنفرانسێکدا، ئاماژەی بەوە دا، کە ھەندێک لایەن دەیانەوێت رووداوەکەی دوێنی، بقۆزنەوە بۆ بابەتێکی نادروست و بە سیاسی دەکەن، راشی گەیاند: "ئەمە راست نییە، لە کوردستان، نە حکوومەت و نە خەڵک، ئەمەی قبوڵە، بەڵکو ھەڵسوکەوتێکی کەسی بووە و چەند کەسێک ئەو کارەیان کردووە".



پارێزگاری ھەولێر، ئەوەشی خستە روو، کە لێکۆڵینەوە لەو رووداوە دەکرێت، پۆڵیس ئێستا خەریکی لێکۆڵینەوەیە، دواتر ئیجرائاتی یاسایی دەکرێت.



گوتیشی: "ئێمە گشت گەشتیاران و خەڵک دڵنیا دەکەینەوە، ئەمە قبووڵ ناکرێت و ئیجرائات دەکرێت، چونکە ئەوە نەفەرھەنگی ئێمەیە، نە بڕوای ئێمەیە، نە سیاسەتی ئێمەیە، نە سیاسەتی خەڵکەکە، لێکۆڵینەوەش بەردەوامە و تا ھۆکارەکەی ئاشکرا دەبێت، تا بزانرێت لەسەر چی بووە"
bas news-