گرنگیپێدەركێ‌ كاروبارێن‌ ئێزیدیان راگەهاند:" هەتا نهۆ بارا پتر یا جادا ئێزیدی سیستەمێ‌ هەلبژارتنان نزانن، پەرلەمانێ‌ عێراقێ‌ یاریێن خۆ ب ئێزدیان دكەن و ئێك كورسیا كۆتا ددەنێ‌ و وان بەردەنە ئێك دا دەنگێ‌ ئێزدیا بەلاڤ بن".

زێدۆ باعەدری، گرنگیپێدەرێ‌ كاروبارێن ئێزیدیان گۆت:"كەس نەمایە كۆتا نەدایێ‌ و پتر ژ مافێ‌ وان دایە توركۆمانا و كوردێن فەیلی و برایێن مەسیحی و سابیئە، ئەز نە دژی وانم و دگەل هندێ‌ مە هەر چینەكا بن دەست چو یا ئایینی یان نەتەوەیی بیت بهێتە كوتا كرن، لێ‌ نە ل سەر كیستێ‌ مە مافێ‌ وان بدەنێ‌ و نە ل بەرامبەر یێ‌ مە قوت بكەن و عێراق هەتا یا ساخە شەرمەزاری ئێزیدیانە، چونكو فەرمانا 74 ل كوكا ئێزیدخانێ‌ ل شنگال چێبوو و هەتا نهۆ ژی ل باژێرێن ئەرەبێن سووننە كچ و كورێن مە تێنە فرۆتن".

باعەدری تەكەستكر:"بۆ هەلبژارتنێن پەرلەمانێ‌ عێراقێ‌ یێن داهاتی ئێزیدی دابەشكرینە سەر ناوچەداریا باشیك و قەزا شێخان و تلكێف و شنگال، ئیرۆ فەرە ئێزدی بزانن هژمارا وان چەندە و هەر قاسمی هەلبژارتنا دێ‌ چەند بەر مە كەڤن و یا پێدڤیە گەلەك بەربژێرێن ئێزیدی خۆ هەلنەبژێرن بۆ ڤان هەلبژارتنان، بۆ نموونە ل هەلبژارتنێن چووی پتر ژ 70 كەسێن ئێزیدی خۆ بەربژێر كربوو و زەرەرەكا مەزن ل بەلاڤكرنا دەنگێن مە بوو، هندەك كەس و پارتێن ئەرەبی شارەزانە و كاری وانە دڤێن ئێزیدیا ب خاپینن و ژمارەكا مەزن ژ ئێزیدیا هەلبژێرن دا دەنگێ‌ وان بەلاڤ بن و ل دەڤەرێن ئێزیدیا بوسلمان خۆ كێم بەربژێر دكەن و ئەڤە دبتە ئەگەرا هندێ‌ ئێزدی بێ‌ بەهردبن ژ جڤاتا پارێزگەهێ‌ و پەرلەمانی".

كوردێن ئێزیدی پتریا وان نهۆ ئاوارەنە و ل كەمپان و خیڤەتان دا ل پارێزگەهێن هەرێما كوردستانێ‌ و چەند دەڤەرێن دیتر دا دژین، هیڤیا وان ئەوە بەری دەستپێكرنا هەلبژارتنان ئەو گرتیێن ئێزیدی یێن د دەستێ‌ داعش دا ماین بهێنە رزگاركرن و ب تایبەت ل دەڤەرا شنگال ئارامی بكەفتێ‌ دا كو ڤەگەرن سەر مۆلك و مالێن خۆ ڤە.













باسنيوز