سەرۆكی لێژنەی ئەمنی لە ئەنجومەنی پارێزگای كەركووك كە لەسەر پشكی یەكێتیی نیشتمانیی كوردستانە ڕای دەگەیەنێت، لە گەڕەكی دەروازەی شاری كەركووك بە بیانوی بوونی تیرۆریست لە ماڵێكدا حەشدی شەعبییان بردووەتە سەر ماڵێک.



ئەمڕۆ سێشەممە 13/2/2018، ئازاد جەباری، سەرۆكی لێژنەی ئەمنی لە ئەنجومەنی پارێزگای كەركووك، ڕاگەیاند: شەوی دووشەممەی ڕابردوو، لە گەڕەكی دەروازەی شاری كەركووك كەسێك كە پیشەی پۆلیسە و کێشەی لەگەڵ دراوسێیەکی هەبووە، پاشان بە بیانووی ئەوەی كە لەو ماڵەدا تیرۆریست هەیە، چووە میلیشیاکانی حەشدی شەعبی و پۆلیسی فریاكەوتن و هێزە ئەمنییەكانی دیکەی عێراقی بردووەتە سەر ئەو ماڵە".



ئازاد جەباری ڕوونیشی كردەوە: "ئیتر تەقەكردن لە نێوان حەشدی شەعبی و كوڕی ئەو ماڵەی كە چووەنەتە سەریان، رووی داوە و تەقەكردنەكەش بۆ ماوەی نیو كاتژمێر بەردەوام بووە".



سەرۆكی لێژنەی ئەمنی لە ئەنجومەنی پارێزگای كەركووک ئاماژەی بۆ ئەوەش كرد: " لە دوای رووداوەكانی 16ی ئۆكتۆبەرەوە هیچ گۆڕانێك لە دۆخی ئەمنی كەركووك ڕووی نەداوە و پۆلیسی فیدرالی و سوپای عێراق و حەشدی شەعبی هەر یەكن و كاری ئەوان تەنیا جل گۆڕینە و هەر حەشدی شەعبین و هیچ لە دۆخەكە نەگۆڕاوە".



بەپێی زانیارییەكانی (باسنیوز) حەشدی شەعبی لەسەر سكاڵای ئەو هاووڵاتییە بە بیانووی بوونی تیرۆریست لەو ماڵەدا بە شێوەیەكی دوور لە گیانی بەرپرسیارێتی هەڵدەكوتنە سەر ئەو ماڵە و پاشان تەقەیەكی زۆر لەو ماڵە دەكەن، ئەمەش بووەتە هۆی ئەوەی كە ترس و دڵەڕاكێی لای دانیشتوانی گەڕەكی دەروازەی كەركووك دروست بێت".



ڕۆژی 16ی ئۆکتۆبەری ساڵی 2017، حەشدی شەعبی و چەند میلیشیایەکی دیکە، بەڕێککەوتن لەگەڵ گرووپێکی خیانەتکار، پەلاماری کەرکووک و خورماتوو و خانەقینیان دا و دەستیان بە سەردا گرت و سەدان ھاووڵاتیی کوردیان شەھید و بریندار کرد و نزیکەی 200 ھەزار کەسیش لەو سنوورانە ئاوارە بوون.



ڕۆژی 18ی ئۆکتۆبەری ساڵی 2017، کۆسرەت ڕەسول عەلی، جێگری سكرتێری گشتیی یەکێتیی لە پەیامێکدا ڕای گەیاند: "ئۆباڵی کارەساتەکانی کەرکووک و خورماتوو لە ئەستۆی کاڵفامەکانی ناو یەکێتی دایە".



ڕۆژی 27/12/2017 جەعفەر شێخ مستەفا، فەرماندەی هێزەکانی 70ی پێشمەرگە و ئەندامی مەکتەبی سیاسیی یەکێتیی نیشتمانیی کوردستان بە ڕاشکاوی ڕای گەیاند: ”هۆکاری 16ی ئۆکتۆبەر ڕیفراندۆم نەبوو، بەڵکوو خیانەتی گرووپێکی نێو یەکێتی بوو“. باسیشی لەوە کرد کە ئەگەر مام جەلال لە ژیان بوایە، ئەو گرووپەی نێو یەکێتیی وەک خیانەتکار سزا دەدا.





باسنیوز