بەرپرسێ راگەھاندنا بەرەڤانیا باژێری ل پارێزگەھا دھۆکێ دیارکر کو کچەکێ ل تاخێ ماسیکێ خۆ سۆتیە و بابێ وێ بزاڤا قورتالکرنا وێ کریە، بەلێ ھەتا رادەیەکی بابێ وێ ژی د ناڤ ئاگری ھەلدبیت و دسۆژیت.



رائیدێ مافپەروەر بێوار عەبدولعەزیز، بەرپرسێ راگەھاندنا بەرەڤانیا باژێری ل پارێزگەھا دھۆکێ، راگەھاند، ئەڤرۆ رۆژا سێشەمبی 6/2/2018 ل دەمژمێر 4:30 ئێڤاری، کچەکا سەنتەرێ باژێرێ دھۆکێ ل تاخێ ماسیکێ، کچەکا 22 سالی رادبیت ئاگری ب گازێ بەرددەتە خوە و پشتی ھینگی بابێ وێ بزاڤا ڤەمراندنا وێ دکەت، بەلێ بابێ وێ ژی ھەتا رادەیەکێ کێم دسۆژیت و ھەردوو پێکڤە بۆ نەخۆشخانا سۆتن و جوانکاریێ ل پارێزگەھا دھۆکێ دھێنە رەوانەکرن و نھا ل ژێر دەرمانکرن و چارەسەریا نۆژدارانە.



( پەیوەندی ب نەخۆشخانا سۆتن و جوانکاریێ ل پارێزگەھا دھۆکێ کر بۆ ھندێ رێژەیا سۆتنا وان ھەردوویان بھێتە ئاشکراکرن، بەلێ ژبەر کو ژ نوو گەھشتینە نەخۆشخانێ و ل ژێر چارەسەریێ نە، ھەتا نوکە رێژا سۆتنا وان یا دیارنینە.



حەمزە رەزیکی، رێڤەبەرێ راگەھاندنا ساخلەمیا پارێزگەھا دھۆکێ، بۆ (باسنیۆز) دیارکر، یا گرنگ نینە رێژەیا سۆتنێ چەند بیت، چونکو گەلەک جاران رێژەیا سۆتنا کەسەکی زێدەترە ژ 80%، بەلێ گیانێ خوە ژ دەست دایە و گەلەک جارا ب رێژەیەکا کێم ژی سۆتیە، بەلێ گیانێ خوە ژ دەست دایە و گۆت: نھا ئەو ھەردوو کەسێن ھاتینە سۆتن ل ژێر چاڤدێریێ نە.
bas ness-