پاڤێڵ تاڵەبانی، کوڕی سکرتێری گشتیی کۆچکردووی یەکێتیی نیشتمانیی کوردستان، ناوچە کوردستانییەکانی ژێر دەسەڵاتی میلیشیاکانی حەشدی شەعبی و سوپای عێراق بە ناوچە ئازادکراوەکان وەسف دەکات و بەرپرسێکی حزبەکەی خۆیشی دەڵێت ”نازانم چۆن خورماتوو ئازاد کراوە؟“.

دوای سەردانەکەی بۆ شاری بەغدای پایتەختی عێراق کە لە دوای 16ی ئۆکتۆبەرەوە بە شێوەیەکی بەردەوام ئەنجامی دەدات، ڕۆژی هەینی 2/2/2018، پاڤێڵ تاڵەبانی دیدارێکی لەگەڵ فوئاد مەعسووم، سەرۆک کۆماری عێراق ئەنجام دا. لەبارەی دیدارەکەوە لە پێگەی تایبەتیی خۆی لە تۆڕی کۆمەڵایەتیی (فەیسبووک) پاڤێڵ تاڵەبانی نووسیویەتی: ”گەڕانەوەی ئۆقرەیی‌ و ژیانی ئاسایی بۆ ناوچە ئازادكراوەكان دووپات كرایەوە“. بەو هۆیەشەوە دەیان کەس لە تۆڕە کۆمەڵایەتییەکان ڕەخنەی توندیان ئاراستەی کردووە و بە بەردەوامبوون لەسەر ئەو سیاسەتە وەسفیان کردووە کە لە 16ی ئۆکتۆبەرەوە دەستی پێکردووە.

لەبارەی بەکارهێنانی دەستەواژەی ناوچە ئازادکراوەکان بۆ کەرکووک و خورماتوو و ناوچەکانی دیکە،مەلا کەریم شکور، بەرپرسی مەڵبەندی حەمرینی یەکێتیی نیشتمانیی کوردستان، ڕایگەیاند: "نازانم خورماتوو چۆن ئازاد کراوە؟ کە ژمارەیەکی زۆر ماڵەکانی تەقێندراوەتەوە و خەڵکەکەشی ئاوارە بووە، بەڵام ئەوەی بەرانبەر خورماتوو کراوە، لە ھیچ شوێنێکی دیکە ڕووی نەداوە و ئەگەر ھێزێکی داگیرکەریش بووایە، بەو جۆرە مامەڵەی لەگەڵ خورماتوو نەدەکرد".

ئەو بەرپرسەی یەکێتی ڕوونیشی کردەوە، ئەو ھێزەی چووەتە خورماتوو، وەکوو داگیرکەر مامەڵەی لەگەڵ خەڵکی ناوچەکەدا کردووە. دووپاتیشی کردەوە: ”مامەڵەی سوپای عێراق و حەشدی شەعبی بەرامبەر بە خورماتوو مامەڵەیەکی نەشاز بووە و وەکوو داگیرکردن مامەڵەی لەگەڵدا کراوە".

مەلا کەریم شکور گوتیشی: ”ھەر کەسێک بڵێ خورماتوو ئازاد کراوە، بۆچوونی خۆیەتی، بەڵام لەگەڵ ئەو قسەیەدا نیم، چونکە مامەڵەیەکی نەشیاو لەگەڵ ھاووڵاتییانی ناوچەکەدا کراوە و دەیان خانووی هاووڵاتییان لەلایەن ئەو ھێزەوە تەقێندراوەتەوە".










باسنیوز