ماڵپەڕێکی سەر بە مەلا بەختیار، لێپرسراوی دەستەی کارگێڕیی مەکتەبی سیاسیی یەکێتیی نیشتمانیی کوردستان ئاشکرای کرد، ئاڵا تاڵەبانی هەوڵی داوە، کۆبوونەوەکەی نێوان حەیدەر عەبادی و سەرۆکی فراکسیۆنە کوردستانییەکان ”تێک بدات“.



بەگوێرەی هەواڵێکی ماڵپەڕی (چاودێر)ی سەر بە مەلا بەختیار، ئاڵا تاڵەبانی، ئەندامی فراکسیۆنی یەکێتی لە پەرلەمانی عێراق، هەوڵی داوە کۆبوونەوەکەی نێوان عەبادی و سەرۆکی فراکسیۆنە کوردستانییەکان تێک بدات.



ماڵپەڕەکە ئەوەشی ئاشکرا کردووە کە ئاڵا تاڵەبانی بە عەبادی گوتووە، ئەگەر لەگەڵ سەرۆکی فراکسیۆنە کوردستانییەکان کۆببیتەوە، ”فراكسیۆنەكانی شیعە و سوننە لێت نیگەران دەبن".



ماڵپەڕەکە ئاماژەی بەوە داوە: ”ئەم هەوڵەی ئاڵا تاڵەبانی، دەرخەری ئەو راستییەیە كە هێشتا كەین‌ و بەین لە نێوان چەند كەسێك‌ و لایەنێك لە حكوومەتی عێراق‌ و كوردستان ماوە بۆ ئەوەی ببنە كۆسپی بەردەمی چارەسەركردنی كێشەكان“.



لە بەرامبەردا ئاڵا تاڵەبانی لە پەیجی خۆیدا لە تۆڕی کۆمەڵایەتیی (فەیسبووک)، هاوشێوەی ئەو کارانەی پێشتر کردوویەتی و دواتر تۆمەتەکەی خستووەتە سەر لایەنی دیکە، ماڵپەڕی (چاودێر)ی بە ”کۆپی پەیستی سایتەکانی پارتی“ تۆمەتبار کردووە و چەند شتێکی ئاماژە پێ داوە وەک پاکانەیەک بەرامبەر ئەو زانیارییانەی کە ماڵپەڕەکە ئاشکرای کردووە.





باسنیووز