بە گوتەی وەزیری کار و کاروباری کۆمەڵایەتیی ئێران، حەسەن ڕۆحانی سەرکۆماری ئەو وڵاتە بڕیاری داوە کە دەبێ هەتا هەفتەی داهاتوو، سنوورەکان لەگەڵ هەرێمی کوردستان، بکرێنەوە.

عەلی ڕەبیعی، وەزیری کار و کاروباری کۆمەڵایەتیی ئێران ئەمڕۆ پێنجشەممە 2017/12/28 لە شاری بانە لە لێدوانێکدا ئاماژەی بەوە کردووە، کە حەسەن ڕۆحانی لە بەرانبەر داخرانی دوو سنووری نێوان باشوور و ڕۆژهەڵاتی کوردستان، کاردانەوەی هەبووە و بڕیاری داوە کە دەبێ لە هەفتەی داهاتوودا ئەو سنوورانە بکرێنەوە.

لە کۆتایی مانگی نۆوە و پاش ڕیفراندۆمی سەربەخۆیی هەرێمی کوردستان سێ سنووری "حاجی ئۆمەران، باشماخ و پەروێزخان" لەلایەن ئێرانەوە داخران و پاش دە ڕۆژ سنووری باشماخ کرایەوە، بەڵام هەتا ئێستا دوو سنووری "حاجی ئۆمەران و پەروێزخان" نەکراونەتەوە.

بەڕای چاودێران و شارەزایانی ئابووری بەهۆی داخرانی ئەو دوو سنوورەوە، تورکیا بازارەکانی هەرێمی کوردستانی داگیر کردووە و زۆربەی بازرگانانی کوردستانیش ڕوویان لە تورکیا کردووە.

بە گوتەی "حشمەتوڵا فەلاحەت‌پیشە" نوێنەری کورد لە شارەکانی "داڵاهۆ و شائاباد" لە پەرلەمانی ئێران، بەهۆی داخرانی ئەو سنوورانەوە ئێران بڕی 2 ملیار و 500 ملیۆن دۆلار زەرەری کردووە.










باسنيوز