ئەندامێکی ئەنجومەنی سەرکردایەتی پارتی دیموکراتی کوردستان لە کەرکووک-گەرمیان ڕای دەگەیەنێت، میلیشیاکانی حەشدی شەعبی لە کەرکووک ھەموو پێشێلکارییەک دژ بە ھاووڵاتییان ئەنجام دەدەن.

عەدنان کەرکووکی، ئەندامی ئەنجومەنی سەرکردایەتیی پارتی دیموکراتی کوردستان لە کەرکووک - گەرمیان، ئەمڕۆ چوارشەممە 27/12/2017، ڕايگەیاند: "میلشیاکانی حەشدی شەعبی لە کەرکووک رۆژ لە دوای رۆژ فشارەکانیان لەسەر خەڵک زیاد دەکەن بۆ ئەوەی ئەو کوردانەی کە لە شارەکەدا ماونەتەوە بەرەو شار و شارۆچکەکانی ھەرێمی کوردستان کۆچ بکەن".

ئەو ئەندامەی ئەنجومەنی سەرکردایەتیی پارتی لە کەرکووک - گەرمیان، ئەوەشی خستە روو، کە میلیشیاکانی حەشدی شەعبی ڕۆژانە ھەڵدەکەوتانە سەر ماڵان، ئەمەش ترس و تۆقاندنی لای دانیشتووانی کەرکووک دروست کردووە.

ئاشکراشی کرد، ئێستا لە کەرکووک ئەوەی کە ئۆتۆمبێلی گران بەھای ھەبێت لە شارەکانی عێراق، یاخود ھەرێمی کوردستان دەیفرۆشێت و ئۆتۆمبێلی کۆن دەکڕێت، چونکە لە سایەی حەشدی شەعبیدا دزینی ئۆتۆمبێل بووەتە دیاردە و تەنانەت لە ناو بازاڕ بە زۆر ئۆتۆمبێل لە خەڵک دەسێنن.

ڕۆژی 16ی ئۆکتۆبەری ڕابردوو، حەشدی شەعبی و چەند میلیشیایەکی دیکە، بەڕێککەوتن لەگەڵ گرووپێکی خیانەتکار، پەلاماری کەرکووک و خورماتوو و خانەقینیان دا و دەستیان بە سەردا گرت و سەدان ھاووڵاتیی کوردیان شەھید و بریندار کرد و نزیکەی 200 ھەزار کەسیش لەو سنوورانە ئاوارە بوون.

ڕۆژی 18ی ئۆکتۆبەری ڕابردوو، کۆسرەت ڕەسول عەلی، جێگری سکترتێری گشتی یەکێتی لە پەیامێکدا ڕای گەیاند: "ئۆباڵی کارەساتەکانی کەرکووک و خورماتوو لە ئەستۆی کاڵفامەکانی ناو یەکێتی دایە".

ڕۆژی 27/12/2017 جەعفەر شێخ مستەفا، فەرماندەی ھێزەکانی 70ی پێشمەرگە و ئەندامی مەکتەبی سیاسیی یەکێتیی نیشتمانیی کوردستان بە ڕاشکاوی ڕای گەیاند: ”ھۆکاری 16ی ئۆکتۆبەر ڕیفراندۆم نەبوو، بەڵکوو خیانەتی گرووپێکی نێو یەکێتی بوو“. باسیشی لەوە کرد کە ئەگەر مام جەلال لە ژیان بووایە، ئەو گرووپەی نێو یەکێتی وەک خیانەتکار سزا دەدا.










باسنيوز