ئەمڕۆ سێشەممە نووسینگه‌ی فوئاد مه‌عسوم سه‌ركۆماری عێراق روونكردنه‌وه‌یه‌كی له‌باره‌ی لێدوانێكی عه‌بدوله‌تیف ره‌شید راوێژكاری سه‌ركۆمار بڵاو كردەوە، تیایدا رایگەیاندووە كە لێدوانێكی ره‌شید بۆ رۆژنامه‌ی "سه‌باح ئه‌لجه‌دید‌" رای خۆیەتی و په‌یوه‌ندی به‌ هه‌ڵوێستی سه‌رۆكایه‌تی كۆماره‌وه‌ نییه‌.


له‌ به‌یاننامه‌ی نووسینگه‌ی سه‌ركۆماردا هاتووه‌ "ئه‌م لێدوانه‌ی دوێنێ عه‌بدوله‌تیف ره‌شید بۆ رۆژنامه‌ی سه‌باح ئه‌لجه‌دیدی داوە، رای تایبه‌تی خۆیه‌تی، هیچ په‌یوه‌ندیه‌كی به‌ هه‌ڵوێستی فه‌رمی و رای سه‌ركۆماره‌وه‌ نییه‌".


سەرۆكایەتی كۆمار دووپاتی كردووەتەوە ئەوان سه‌رجه‌م را و هه‌ڵوێسته‌كانی سه‌رۆكایه‌تی كۆمار له‌ ماڵپەڕی ئه‌لیكترۆنی سه‌ركۆمار و لێدوانه‌كانی سه‌رۆكی كۆمار بۆ ده‌زگا میدیاكانه‌وه‌ بڵاوده‌كرێنه‌وه‌.


دوێنێ عه‌بدوله‌تیف ره‌شید كە لەسەر حیسابی هەرێمی كوردستان، راوێژكاری سه‌ركۆماری عێراقە، لە رۆژنامه‌ی "سه‌باح ئه‌لجه‌دید" هێرشی كردبووە سەر حكوومەتی هەرێمی كوردستان و رایگه‌یاندبوو كە حكومه‌تی هه‌رێم نوێنه‌رایه‌تی خه‌ڵكی كوردستان ناكات، هەروەها گوتبووی سەرۆك مه‌سعود بارزانی كاروباره‌كانی هه‌رێم به‌ڕێوه‌ ده‌بات، ئه‌مه‌ش نیگه‌رانی سه‌ركۆماری عێراقی به‌دوای خۆیدا هێنا و به‌ توندی ره‌تی كرده‌وه‌.

bas news-