بەرپرسێ‌ لقێ‌ 20ێ‌ پارتی دیموكراتی كوردستان ل قەزا شێخان دیاركركو ئەڤرۆ 26/7/2017 پەردە ل سەر وێنێن دوو شەهیدێن نەمر یێن دەڤەرا شێخان هاتە لادان. هەر دوو شەهێد برایێن ئێكن ل شەرێ‌ تیرۆرستێن داعش گیانی خوە كرینە قوربان.



مەحمود ئێزدی، بەرپرسێ‌ لقێ‌ 20ێ‌ پارتی دیموكراتی كوردستان ل قەزا شێخان دیاركر: "ب بەرهەڤبوونا هژمارەكا زۆر ژ جەماوەری شێخان و كەس وكارێن هەردوو شەهیدان و دام ودەزگەهێن حكومی و حزبی پەردە لسەر وێنێن هەردوو شەهیدێن قەرەمان شەوكەت یونس و نووری یونس هاتە لادان ل زالگەها ئەتروش یا سەر قەزا شێخان ڤە. هەر دوو برایێن شەهید قەرەمانیەكا مەزن بۆ پاراستنا ئاخا كوردستانێ‌ كرن".



خۆیا ژی كر: "هەردوو شەهید خەلكێ‌ گۆندی دەحلێنە بوون ل دەڤەرا شێخان دەمێ‌ تیرۆرستێن داعش هیرشی سەر كوردستانێ‌ كری هەردوو شەهیدان قەستا چەپەرێن شەری كرن بۆ بەرەڤانیی ژ ئاخا كوردستانێ‌. ئەڤان هەردوو شەهیدان ل میحوەرێ دیجلە و میحوەرێ‌ بەنداڤا مووسل زۆر قەرەمانیەكا مەزن بۆ پاراستنا كوردستانێ‌ كرن".
bas news-