پێشمەرگەیێ کوردستانێ ل چەپەرێن شەرى چاڤەریێ ئەنجامدانا ریفراندۆمێ نە، ب تایبەت پشتى ژناڤبرنا تیرۆرستێن داعشێ و ب پەرلەمانێ ئورۆپا فەرمى خۆ ب قەردارێ پێشمەرگەیى زانى.

پشتى شاندێ بلندێ هەرێما کوردستانێ ب سەرپەرشتیا (مەسعود بارزانى)، سەرۆکێ هەرێما کوردستانێ ل پەرلەمانێ ئورۆپا ل بروکسل بایتەختێ بەلجیکا کومبووین، تەوەرێ هەرە سەرەکى بەحس لێ هاتیە کرن ریفراندۆم بوو، (سەرۆک بارزانى) رۆلێ پێشمەرگەیى بۆ ژناڤبرنا تیرۆرێ و رزگارکرنا 30 هزار کلیومەتران ژ دەستێن داعشێ و ژناڤبرنا 15 هزار تیرۆرستان بەحس کر، سەرارایى هندێ پەرلەمانێ ئورۆپا خۆ ب قەردارێ پێشمەرگەیى زانى، لەوا ئەڤ پەیامە بۆ جهێ دلخوشیا پێشمەرگەیى و خەلکێ کوردستانێ، (سالار شێخکى) لیوایێ پێشمەرگەیى و ئەندامێ فەرماندەیا پێشمەرگەیى زێرەڤانى گۆت:" هندەک دەلیڤە ددیرۆکێ دا دزێرینن، ریفراندۆم ژى دەلیڤەکە ئەگەر ژ دەست بدەین، بلا مە باوەرى هەبیت نازڤریتە ڤە، کۆ سەرۆک بارزانى چەندین جارا ئاماژە دایە هەموو شەهیدێن کوردستانێ دپیرۆزن، لێ شەهیدێن شەرێ دژى تیرۆرێ، شەهیدێن دەولەتا کوردستانێ نە، لەوا پێشمەرگە ب روح و دەنگ دگەل دەولەتا کوردى نە".

(سالار شێخکى)، بۆ مالپەرێ فەرمیێ پارتى دیموکراتى کوردستان راگەهاند:" هەموو دونیا قەردارێ پێشمەرگەیە و خۆینا شەهیدانە، جونکو مەزنترین رێکخراوا تیرۆرى لسەر ئاستێ دەولى ژناڤبر، چەوا پێشمەرگەیى ب خۆینا خۆ سنۆرێن هەرێما کوردستانێ دەست نیشانکرن، دێ ب هەمان روحیەت خەلک و پێشمەرگەیێ کوردستانێ بدەنگێ خۆ ژى بێژن بەلێ بۆ ریفراندۆمێ و دەولەتا کوردستانێ".

سەرارایى ئاماژەکرنا دەستورێ عیراقێ یێ سالا 2005ێ ب پێشمەرگەیى، کۆ هێزکا فەرمیە ل عیراقێ، لێ دراستى دا ب چ رەنگان ئەو سەرەدەریى دگەل نەکریە، (بەدرخان زاویتەیى) چاڤدێرێ سیاسى گۆت:" ژ سالا ١٩٩٢ تا سالا ٢٠١٤ێ، دەولەتا عیراقێ ب هیچ شێوەیەکى مافێن پێشمەرگەیى پێ نەداینە، و دشەرێ دژى تیرۆرێ دا ل عیراقێ دیار بوو تاکە هێز بەرسینگێ تیرۆرستێن داعشێ گرتین، پێشمەرگەیێ کوردستانێ بوویە، لەوا دەولەتێن جیهانى و ب تایبەت وەلاتێن زێلهێز خۆ ب قەردارێ پێشمەرگەیى دانا".

(بەدرخان زاویتەیى) گۆت ژى:" پێشمەرگەیى ب شەرێ بەرەڤانیکرنێ ژ ئاخا کوردستانێ و هەموو دونیایێ، بۆ سمبولا ئاشتیێ ل جیهانێ و ناسنامەیا مللەتێ کورد، هەر چەندە ژ رۆیى سیاسى ڤە چەندین جارا رێگرى لێ هاتیەکرن، کۆ دەربازى هندەک دەڤەران نەبیت، لێ پێشمەرگەیى خۆ لبەر گرتیە و نەهێلایە تیرۆرست بمینە لوان دەڤەران ژى، دهەمان دەمدا گەلەک هەولدان هاتنەکرن تیرۆرست وەلاتێن ئورۆپى تێکبدەن، لێ ژ ئەگەرێ بهێزکرنا تیرۆرستان ژلایێ پێشمەرگەیى ڤەیى ئاشتى لوان وەلاتان ژى بەرقەرار بوو".

(زاویتەیى) گۆت ژى:" پشتى ڤان دەستکەفتان، جیهانێ هەموویێ ب چاڤەکێ مەزن بەرێخودا دۆزا کوردى و پێشتەڤانى ل مافێن کوردان کرن و ب تایبەت ریفراندۆمێ".

(سازڤان نێرەویى) نەقیبێ پێشمەرگە، بۆ مالپەرێ فەرمیێ پارتى دیموکراتى کوردستان راگەهاند:" دخوازم ژ هەر تاکە کوردەکى چەوان ب هەست و سوز و ڤیان ب گریان و روندک دگەل مەدا بوون و پالپشتێن مە بوون ل سەنگەران و شیانین بەرخودانێ بکەین، ب هەمان دلسوزیێ و هەست بەرەف سندوقێن دەنگدانێ بجێن و بێژن بەلێ بو ریفراندۆمێ، جونکو ریفراندۆم باشترین چارەسەرى یە بو ب دەستڤەئینانا سەربەخویێ و بنیاتە بو دەولەتبوونێ".

(سازڤان نێروەیى) گۆت ژى:" ریفراندۆم پرسەکا نیشتیمانی و چارەنڤیسازە، گرنگە هەموو لایەن و هەر کوردەک پشکدار ببیت و دەنگ ب بەلێ بدەت، دا ئێدی ئەم و نەڤیێن مە نەبینە بەندەیێن عەرەب و تورک و فارسا و هەر دوژمنەکێ دیتر".

kdp-