به‌رپرسێكى هاتوچۆ ئاشكرای ده‌كات، له‌ دواین بڕیار له‌سه‌ر ئۆتۆمبێله‌ بێ سه‌ره‌تاكان بڕیار دراوه‌ ته‌واوى ئه‌و ئۆتۆمبیلانه‌ى مۆدێلیان له‌ ساڵى 2000 به‌ره‌و سه‌ره‌وه‌یه‌، تۆمار بكرێت.

نه‌قیب كارزان مه‌جید، به‌رپرسى به‌شى ڕاگه‌یاندن و په‌یوه‌ندییه‌كانى هاتوچۆى ئیداره‌ى گه‌رمیان ڕاگه‌یاند :" له‌ كۆبونه‌وه‌ى دوێنێى وه‌زیرى ناوخۆى حكوومه‌تى هه‌رێم و به‌ڕێوه‌به‌رى گشتى هاتوچۆى هه‌رێم، بڕیار دراوه‌ به‌ تۆماركردنى ته‌واوى ئۆتۆمبیله‌ بێ سه‌ره‌تاكان".

ئه‌وه‌شى گوت :" تۆماركردنه‌كه‌ به‌ جۆرێكه‌، كه‌ ئه‌و ئۆتۆمبیلانه‌ى مۆدێلیان ساڵى 2000 به‌ره‌و سه‌ره‌وه‌یه‌ و بڕاوه‌ نه‌بێت تۆمار ده‌كرێن و ده‌بن به‌خاوه‌نى تابلۆى هه‌رێمى كوردستان ".

ئاماژه‌ى به‌وه‌ش كرد، كه‌ :" بڕى پاره‌ى گومركى هه‌ر ئۆتۆمبێلێك له‌ 500 هه‌زار دینار زیاتر نییه‌ و هه‌روه‌ها به‌پێى پستۆن پاره‌ له‌به‌رامبه‌ر پێدانى تابلۆ وه‌رده‌گیرێت ".

ماوه‌یه‌كه‌ له‌ سنورى ئیداره‌ى گه‌رمیان و چه‌ند ناوچه‌یه‌كى هه‌رێمى كوردستان، ئۆتۆمبێله‌ بێ سه‌ره‌تاكان به‌شێوه‌یه‌كى به‌رچاو ڕوویان له‌ زیادبوون كردووه‌، به‌تایبه‌ت جۆره‌ ئۆتۆمبێلێك كه‌ پێى ده‌گوترێت (مه‌لیكه‌).

bas news-