چالاکڤانێن سیاسى دبێژن، نوکە گونجاترین دەمە بۆ ئەنجامدانا ریفراندۆمێ و مللەتێ کورد گەهشتیە وێ باوەریێ ئێدى ب چ رەنگەکى نەشێن دگەل عیراقێ هەڤپشک بن.

ل 7ێ حوزیرانا ئەڤ سالە دا، د کومبوونەکا بەرڤرەه یا هەموو یا لایەنێن سیاسى ب سەرپەرشتیا سەرۆکێ هەرێما کوردستانێ (مەسعود بارزانى)، بریار هاتەدان ل 25ێ ئەیلولا ئەڤ سالەدا ریفراندۆم ژبۆ سەربەخۆیا کوردستانێ بهێتە ئەنجامدان و پرانیا خەلکێ کوردستانێ پێشۆازى لڤێ بریارێ کر، چالاکڤانێن سیاسى دبێژن، نوکە گونجاترین دەمە بۆ ئەنجامدانا ریفراندۆمێ و مللەتێ کورد گەهشتیە وێ باوەریێ ئێدى ب چ رەنگەکى نەشێن دگەل عیراقێ هەڤپشک بن. (د. بهار سلیمان) ئەنداما جڤاتا نوونەرێن عیراقێ سەر ب فراکسیونا پارتى ڤە گۆت:" بوچى دگەل عیراقێ بمینین؟، کۆ تا نوکە ب هیچ شێوەکى دانپێدان ب مافێ مللەتێ کورد نەکریە و ب تایبەتى مافێن پێشمەرگەیێ کوردستانێ یێ مل ب ملێ لەشکەرێ عیراقێ ڤە شەرێ مەزنترین رێکخراوا تیرۆرى (داعشێ) کرى، و سەرکەفتن ل هەرێما کوردستانێ و عیراقێ توماركرین".

دوهى، (سەرۆک بارزانى) دگەل شاندێ جڤاتا بلندا بالایێ ریفراندۆمێ، سەرەدانا پەرلەمانێ ئورۆپا ل برۆکسل کر، لگۆر دیتنێن چالاکڤانێن سیاسى، دێ پێگەهێ کوردان بڤێ سەرەدانێ بهێزتر لێ ئێت.

(د.بهار سلیمان) گۆت:" ریفراندۆم پرسەکا نەتەوەیى- نیشتمانى یە، گرێدایى جارەنڤیسێ مللەتێ کوردە، ب باوەریا من ئێدى هەموو جیهان و ب تایبەت کورد گەهشتینە وێ ئێکێ ب چ شێوە کورد بۆ داهاتى نەشێن دگەل عیراقێ بژین، جونکو چ بنەما بۆ عیراقەکا ئێکگرتى نەمایە".

ئەنداما جڤاتا نوونەرێن عیراقێ سەر ب فراکسیونا پارتى دیموکراتى کوردستان گۆت ژى:" سەرەدانا شاندێ جڤاتا بلندا ریفراندۆمێ ب سەرپەرشتیا (سەرۆک بارزانى) ب ئەرینى دبینم، هەموو پێکهاتەیێن سیاسى دگەلدانە و باوەرم دێ هەڤپەیمانێن نیڤدەولى دروست کەن، جونکو لدووڤ پرسەکا حەزا جەماوەر و خەلکێ کوردستانێ برێکەفتینە ئورۆپایێ، ئەو ژى ئەنجامدانا ریفراندۆمێ یە".

سەبارەت ڤێ پرسێ، (د. حەمید باڤى) چالاکڤانێ سیاسى بۆ مالپەرێ فەرمیێ پارتى دیموکراتى کوردستان راگەهاند:" شاندێ ناڤبرى نوونەراتیا هەموو گەلێ کورد ب (ئاشور و تورکمان و کورد) و هەموو پارتێن سیاسى دکەت، لەوا باوەرم دێ پێگەهێ کوردان بۆ پرسا ریفراندۆمێ لسەر ئاستێ دەولى بهێز کەفیت".

(د. حەمید باڤى) گۆت ژى:" هندەک وەلاتێن ئورۆپى یێن پێشتەڤانیا پێشمەرگەیێ کوردستانێ کرى، دوێ باوەرێ دامە دێ پێشتەڤانیەکا موکمتر ل ریفراندۆما کوردستانێ کەن، جونکو وان سەربۆر دڤێ بابەتى دا هەیە و پاش دزانن وەلاتێن زولم لێکرى داخوازیا ڤێ ئێکێ و جودابوونێ دکەن، سەرارایى هندى دخوازم ناکوکیێن نافخویا هەرێما کوردستانێ کێمتر ببن ژبۆ پاراستنا پەرژەوەندیا گشتى یا مللەتێ کورد".
kdp-