لە کۆبوونەوەی ئەمڕۆی لیژنەی ڕیفراندۆم بە سەرۆکایەتیی سەرۆکی ھەرێمی کوردستاندا چەندین بڕیاری گرینگ دران، لەوانە پێکھێنانی چەندین وەفد و لیژنە. ئەندامی لیژنەی ڕیفراندۆم، کە بەشداربووی کۆبوونەوەکە بوو، (هاوکار مەحموود) دەڵێت، لە چەند ڕۆژی دابێدا شاندی ڕیفراندۆم سەردانی یەکێتیی ئەورووپا دەکات.


ئەمڕۆ لە پیرمام یەكەم كۆبوونەوەی ئەنجومەنی باڵای ڕیفراندۆم بە سەرپەرشتیی (مەسعوود بارزانی)، سەرۆكی هەرێمی كوردستان و بەشداریی نوێنەری پارتە سیاسی و پێكهاتە نەتەوەیی و ئایینییەكانی ئەندام لەو ئەنجومەنەدا بەڕێوە چوو. (ھاوکار مەحموود)، ئەندامی لیژنەی ڕیفراندۆم لەبارەی کۆبوونەوەکە و دروستبوونی لیژنەکانەوە بە ماڵپەڕی فەرمیی پارتی دیموکراتی کوردستانی ڕاگەیاند: ''لە دوای کۆبوونەوەی یەکەم، ئەمڕۆ کۆمیتەی ڕیفراندۆم دووەم کۆبوونەوەی خۆی ئەنجام دا و لەم کۆبوونەوەیەدا چەندین لیژنەی گرینگ دروست کران، لەوانە کۆمیتەی ڕاگەیاندن و کۆمیتەی یاسا و ھەماھەنگی لەگەڵ کۆمسیۆن و کۆمیتەی ئابووری و پێکھێنانی چەند وەفدێک بۆ سەردانی یەکێتیی ئەورووپا و وڵاتانی دەوروبەر، چونکە یەکێتیی ئەورووپا خۆی داوای کردبوو لیژنەیەکی فەرمیی ھەرێم سەردانی ئەوان بکات و جگە لەوەش، سکرتاریەتێک دروست دەکرێت بۆ ڕاپەراندنی کاروباری کۆمیتەکان، گوتەبێژێکیش بۆ لیژنەکە دیاری دەکرێت.

(ھاوکار مەحمود) گوتی: ''ئەو کۆمیتە و شاندانەی دروست دەکرێن، دەکرێ کەسانی بێلایەن و پسپۆڕ بن و دەکرێ کەسانی حزبیشی تێدا بەشدار بێت، چونکە ڕیفراندۆم ھی ھەموو خەڵکی کوردستانە، بۆیە دەکرێ سوود لەو خەڵکەش وەرگرن.''

(ھاوکار مەحمود) دەڵێت: ''لە سبەیەوە دەست دەکرێت بە جێبەجێکردنی ئەو بڕیارانە و لە چەند ڕۆژی دابێدا وەفدی ھەرێم بۆ یەکێتیی ئەورووپا ئامادە بێت و سەردانەکە ئەنجام بدات.''

(مەحموود) ڕوونیشی کردەوە: ''نوێنەری ھەموو ئەو لایەن و پێکھاتانەی لە کۆبوونەوەی بڕیاری ئەنجامدانی ڕیفراندۆمدا بەشدار بوون، لەم کۆبوونەوەیەشدا بەشدار بوون، جگە لە گۆڕان و کۆمەڵی ئیسلامی، بەڵام باس لەوە کرا کە ھەوڵ دەدرێت ئەوانیش ڕازی بکرێن، بۆ ئەوەی بەشداری بکەن و بایکۆت بشکێنن.''

kdp-