وەزیری دەرەوەی سووریارووسیا رایدەگەیەنێت، کە لەگەڵ ئەمریکا رێککەتوون لەسەر راگەیاندنی ئاگربەست لە باشووری سووریا.



سێرگی لاڤرۆڤ، وەزیری دەرەوەی رووسیا لەمیانی بەشداریکردنی لە کۆبوونەوەکانی لوتکەی G20 لە هامبۆرگ، رایگەیاندووە، کە رێککەوتنەکەی رووسیا و ئەمریکا دوای نیوەڕۆی رۆژی یەکشەممە 9.7.2017 دەچێتە بواری جێبەجێکردن.



سێرگی لاڤرۆڤ هەروەها رایگەیاندووە، کە رێککەوتنی نوێنەری رووسیا و ئەمریکا، بە ئامادەبوونی نوێنەری ئوردن بووە و لە عەمانی پایتەختی ئەو وڵاتەش گەیشتوونەتە رێککەوتنەکە، بۆ وەستاندنی شەڕ لە ناوچەکانی دەرعا، قونەیترە و سوەیدا لە باشووری سووریا.



رووسیا، کە لەسەرەتا شەڕی ناوخۆیی سووریاوە پشتگیریی رژێمی سووریا دەکات، وەک نوێنەری رژێمی سووریا رێککەوتنەکەی واژۆ کردووە و ئەمریکاش، کە پاڵپشتیی بەشێک لە گرووپە ئۆپۆزیسئۆنەکان دەکات، لە بری ئەو گرووپانە رێککەوتنەکەی واژۆ کردووە.



شەڕی ناوخۆیی سووریا لە مانگی ئاداری 2011ـەوە لە نێوان گرووپە چەکدارییەکانی ئۆپۆزیسیۆن سووریا و رژێمی ئەو وڵاتە دروست بووە و بووەتە هۆی کوژرانی لانی کەم 500 هەزار هاووڵاتیی و ئاوارەبوونی زیاتر لە پێنج ملیۆن کەسی دیکە.




باسنیوز