بەری چەند خولەکان ل زنجیرە چیایێ کورەژاری ل سنورێ ھەردوو ناحیێن شێلادزێ و دێرالوکێ بومبەکا چاندی ب کەسەکێ خەلکێ ناحیا شێلادزێ ڤە پەقی و ھەتا نوکە ئەو کەسێ بریندار نەھاتیە رەوانەکرن بو نەخوشخانێ.



ئێکەم دەزگایە ئەڤی ھەوالی بەلاڤ دکەت و پەیامنێرێ باسنیوز ل دەڤەرا ئامێدیێ ئاماژە ب وێ چەندێ کر برینا وی کەسی یا گرانە و ھەتا نھا ئەو کەسێ بریندار نەھاتیە رەوانەکرن بو نەخوشخانا تەنگاڤیان.



عەسکەر تەمەر رێکانی، خەلکێ گوندێ سوریانە ب سەر دەڤەرا رێکان ڤە و کەس و کارێ وی کەسێ بریندارە بو تایبەت بو ئاژانسا گوت: "ئەڤرۆ ل رێکەفتی 6/7/2017 کەس و کارەکێ مە ب ناڤێ (عەبدولا جاسم) کو خەلکێ گوندێ (سووریانە) سەر ب دەڤەرا رێکان ڤە ل سنورێ ناحیا شێلادزێ، قەستا زنجیرە چیایێن کورەژاری کریە ب مەرەما بدەستڤەھاتنا بەرھەمێ ھاڤینیێ (کەنگرۆکان) لێ بەری دەمژمێرەکێ کەسێن دگەل وی ئەم ئاگەھدار کرین کو ل چیایێ کورەژاری بومبەکا چاندی ب وی کەسی ڤە پەقی یە و ھەتا نوکە نەگەھشتیە نەخوشخانی."



کەس و کارێ وی کەسێ بریندار بو ئەو چەندە ژی نەڤەشارت: "ئەوی کەسێ بریندار (دەستەکێ خو ) ژ دەست دایە و برینا وی یا گرانە چونکە ئەو بومبا ب وی ڤە پەقی یا نێزیکی وی بو و کەس و کارێن وی ل شێلادزێ بلەز قەستا جھێ رویدانێ کریە ب مەرەما ڤەگەراندنا وی بو نەخوشخانێ".



ناڤھاتی ئەو چەندە ژی گوت: "ئەو کەسێ ب گرانی بریندار بوی د ژیێ پتر (50) سالیێ دایە و خەلکێ ناحیا شێلادزێ یە و ژ وەلاتێ ئیرانێ قەستا ناحیا شێلادزێ کریە و ل ڤێ دەڤەرێ یێ نیشتەجێ یە و گوت ژی: ژ بەر کو رێکا ترۆمبێلێ ناچیتە جھێ رویدانێ لەورا تیمەکا بلەز ژ کەس و کارێن وی کەسی قەستا جھێ رویدانێ کریە دا کو ب رێکا (پێیان) وی کەسێ بریندار بوی ب ڤەگوھێزنە نەخوشخانەکا تەنگاڤیان ل سنوورێ پارێزگەھا دھوکێ".
bas news-