محەمەد خورشید: سەرۆک بارزانی پشتگیری لە کەیسی ڕێبوار تاڵەبانی دەکات
ڕۆژی 28ی ئادار ئەنجومەنی پارێزگای كەركووك كۆ بووەوە و بە زۆرینەی دەنگی ئەندامانی بڕیار درا، كە ئاڵای كوردستان لە سەرجەم فەرمانگە و دامەزراوە حكومییەكانی پارێزگای كەركووك هەڵبدرێت. لە دژی ئەم هەنگاوەش چەند لایەنێك سكاڵایان لەسەر (ڕێبوار تاڵەبانی)، سەرۆكی ئەنجومەنی پارێزگای كەركووك/ بەوەكالەت تۆكار كرد و 3ی ئەم مانگەش دادگاییكردنی لەسەر هەڵكردنی ئاڵای كوردستان لە كەركووك هەبوو، بەڵام بۆ 24ی ئەم مانگە دوا خرا.
(د. محەمەد خورشید) بە ماڵپەڕی فەرمیی پارتی دیموكراتی كوردستانی ڕاگەیاند: ''هەر لە سەرەتای هەڵكردنی ئاڵای كوردستان لەسەر بارەگای ئەنجومەنی پارێزگای كەركووكەوە، ئەنجومەنی نوێنەرانی عێراق و ئەنجومەنی وەزیرانی عێراق چەند بڕیارێكیان لە دژی دا، هەر لە سەرەتاوە پارتی دیموكراتی كوردستان لەسەر خەت بووە لە دژی ئەو بڕیارانە و پشتگیریی مانەوەی ئەو ئاڵایەمان كردووە بە هەموو شێوەیەك. بەم دواییەش هەندێك لە ئەندامانی بەرەی توركمانی و شیعەی توركمان لە كەركووك سكاڵایان لەسەر (ڕێبوار تاڵەبانی)، سەرۆكی ئەنجومەنی پارێزگای كەركووك/ بەوەكالەت تۆمار كردووە لەسەر ئەم بابەتە. هەر لە سەرەتاوە ئێمە وەكو پارتی لە كەركووك لەسەر خەت بووین لەگەڵ (ڕێبوار تاڵەبانی).''
بەرپرسی لقی 3ی پارتی لە كەركووك ئاشكرایشی كرد: ''(سەرۆك بارزانی)، خۆی لە نیزیكەوە لە ڕێی نوێنەری تایبەتی خۆی، (هێمن هەورامی)یەوە پەیوەندیی بە (ڕێبوار تاڵەبانی)یەوە كردووە و پشتگیریی خۆی بۆ كەیسەكەی دووپات كردووەتەوە. لەگەڵ هەڤاڵانی لقی پێنجی بەغدای پارتیش قسەمان كردووە و ئەوانیش لەسەر بڕیاری نووسینگەی (سەرۆك بارزانی) پارێزەریان بۆ كەیسەكەی (ڕێبوار تاڵەبانی) دابین كردووە.''
(د. محەمەد خورشید) جەختیشی كردەوە: ''دۆسییەكە بە دۆسییەی خۆمان دەزانین و ئێمەی پارتی بە هەموو شێوەیەك پشتگیری لە (ڕێبوار تاڵەبانی) دەكەین، چونكە ئەمە بابەتێكی نیشتمانییە و بە هیچ شێوەیەك لێی پاشگەز نابینەوە.''
kdp-
