رێڤەبەرێ ناحیا شێلادزێ، دیاری کر کو وەکە دیار گەلیێ بالندا جوانترین دیمەنێن سەرنج راکێش و گوزاری ھەنە و ھەتا نھا ژ لایێ حکومەتا ھەرێما کوردستانێ ڤە چ گرنگی ب وان دیمەنێن جوان و گەشت و گوزار نەھاتیە دان و ئەگەرێ وێ ھەمو چەندێ ژی ھەبونا چەکدارێن پەکەکێ یە ل سنورێ ناحیا شێلادزێ.



وارشین سەلمان، رێڤەبەرێ ناحیا شێلادزێ، دیارکرن: "گەلەک دەڤەرێن دی حکومەتا ھەرێما کوردستانێ شیایە گرنگیێ پێ بدەت لێ ژ بەر کو چەکدارێن پەکەکێ رێژەکا مەزن یا گوندێن دەڤەرێن نێروە و رێکان و دوسکی ژووریان ل سنورێ ناحیا شێلادزێ داگیر کرینە و ئەو ھەمو دەڤەرێن جوان کرینە دەڤەرەکا سەربازی لەورا ژ لایێ حکومەتا ھەرێما کوردستانێ ڤە ھەتا نھا چ گرنگی پێ نەھاتیە دان و ئەگەر ژی چەکدارێن پەکەکێ".


رێڤەبەرێ ناحیا شێلادزێ، گوت ژی :"گەلیێ بالندا باشترین و خوشترین جھێ گەشت و گوزارێ یە ل سنورێ پارێزگەھا دھوکێ لێ ھەتا نھا حکومەت نەشیایە پرۆژەیەکێ گەشت و گوزاری ل وێ دەڤەرێ ئاڤەدان بکەت یان ژی رێک و بانێن وێ دەڤەرێ خوش بکەت و زێدەباری وێ چەندێ ھەمو رۆژان خەلکێ ھەمو دەڤەران ب تایبەتی سنورێ ناحیێن شێلادزێ و دێرالوکێ و سەنتەرێ ئامێًدیێ قەستا گەلیێ بالندا دکەن و ل ھاڤینگەھێن ئاڤا مارکی دەمێن خو ب سەر ب بەن".


ئەڤ زیدەتر گوت: "چەند مارکێتەک ل سەر رویبارێ ئاڤا مارکی ھاتینە دروستکرن لێ نە ب فەرمی بونە و بوردومانکرنا وان جھان ژ لایێ فروکێن لەشکەرێن تورکیا ڤە جھێ دلتەنگیێ یە و رۆژانە فروکێن لەشکەرێن تورکیا ب ئەگەرێ وێ چەندێ کو چەکدارێن پەکەکێ ل سنورێ ناحیا شێلادزێ نیشتەجێ نە ھەمو رۆژان ئەو جھێن جوان دھێنە بوردومانکرن و ئەگەر چەکدارێن پەکەکێ ئەوێ دەڤەرێ چول بکەن دێ گەلیێ بالندا بیتە باشترین جھێ گەشت و گوزارێ ل ھەرێما کوردستان و پارێزگەھا دھوکێ".


وارشین سەلمان، ئەو چەندە ژی نەڤەشارت: "خودانێن ئەوان مارکێتێن ل سەر رویبارێ ئاڤا مارکی دخوازن کارەبا گشتی ژ شێلادزێ بو وان بھێتە راکێشان لێ ژ ئەگەرێ ھەبونا چەکدارێن پەکەکێ ب چو رەنگان نھا دا ئەم نەشێن وێ داخازیێ بو ب جە ب ئینین و ھندی پەکەکە ل وان دەڤەران یا نیشتەجێ بیت چ خزمەتگوزاری بو گەلیێ بالندا و ئاڤا مارکی ناھێنە دابینکرن".
bas news-