زیاتر لە 80 ڕێكخراوی كۆمەڵگەی مەدەنی لە شاری هەولێر دەستیان بە چالاكییەكانی (بەڵێ) بۆ ڕیفراندۆم كردووە و ئاماژە بۆ ئەوە دەكەن كە سنووری چالاكییەكەشیان هەموو كوردستان دەگرێتەوە.

لە بەیاننامەیەكدا 80 ڕێكخراوی كۆمەڵگەی مەدەنی دەستپێكی هەڵمەتی (بەڵێ) بۆ ریفراندۆمیان ڕاگەیاندووە.

لە بەشێكی ئەو بەیاننامەیەدا هاتووە: "خەونی هەزاران ساڵەی نەتەوەیە كە هەرچی ناهەقی بەرامبەری كراوە ئێستا هاتووەتە بەر دەرگا و دەیەوێت ببێت بە ڕاستی، بۆیە تۆی هاووڵاتی تەنها ئەوەندەت لەسەرە بڵێ (بەڵێ) و بەو هۆیەشەوە دەگەین بەو ئاواتەی كە سەدان هەزارا شەهیدمان لەپێناویدا خوێنی ڕژاوە".

ئەو ڕێكخراوانەی كۆمەڵگەی مەدەنی ئاماژەیان بۆ ئەوە كردووە: "ئێمەی ڕێكخراوەكانی كۆمەڵگەی مەدەنی بە ئەركی خۆمانی دەزانین بە ڕێگەی خۆمان كە ڕێگەی مەدەنی و نواندنی چالاكیی مەدەنیانەیە كار بۆ ئەو پرسە نەتەوەییە بكەین، هەر بۆیە دەست بە چالاكییەكانمان دەكەین تا دەگەینە ئەنجام، چالاكییەكانیشمان لە شاری هەولێر پایتەختی هەرێمی كوردستانەوە دەست پێ دەكات و دواتریش بازنەی چالاكییەكان بۆ تەواوی شار و شارۆچكە و دێهاتەكانی كوردستانیش فراوان دەكەین".

هاوکات دیار ئەحمەد سەرپەرشتیاری كاروبارەكانی ئەو دەستەیەی ڕێكخراوەكانی كۆمەڵگەی مەدەنی گوتی: "ئەو ڕێكخراوانەی كۆمەڵگەی مەدەنی لە دوای ڕاگەیاندنی وادەی ریفراندۆم لەلایەن لە کۆبوونەوەی سەرۆکی هەرێمی کورردستان و لایەنە سیاسییەکانی هەرێم، ئێمەی ڕێكخراوەكانی كۆمەڵگەی مەدەنی بە ئەركی خۆمانی دەزانین كار بكەین بۆ ئەوەی زۆرترین دەنگی (بەڵێ) كۆ بكەینەوە. ئەو ڕێكخراوانەش لەو پرۆسەیەدا كار دەكەن دەكرێ هەموو دەنگ و ڕەنگێك لەخۆی بگرێت و ئەوانە نەبێت كە دژایەتیی پرۆسەكە دەكەن".










باسنیوز