مەسیحییەکانی دیانا پشتگیری خۆیان بۆ ریفراندۆم دەربڕی
(شم یاقو) هاووڵاتیەكی مەسیحییە لە دیانا بۆ ماڵپەڕی فەرمیی پارتی دیموكراتی كوردستان گوتی: هەزارجار بەڵێ بۆ ریفراندۆم و سەربەخۆیی كوردستان، لەبەر ئەوەی ریفراندۆم و سەربەخۆیی كوردستان دەبێتە مایەی خێر و خۆشی بۆ ئێمە و ئازادبوونی ئێمە لە زوڵم و زۆرداری حكوومەتە یەك لە دوایەكەكانی عێراق كە بە درێژایی مێژوو ئێمە چەوسێنراونەتەوە و لەناوبراوین، هەر لەبەر ئەو حكوومەتە بە هەزاران خێزانی مەسیحی لە پارچەكانی دیكەی عێراق ئاوارەی هەرێمی كوردستان و ئەورووپا بوونە.
( سەرگیز حەنا) كەسێكی دیكەی مەسیحیە لە هەودیان كە دەكەوێتە سنووری سۆران بۆ ماڵپەڕی فەرمی پارتی دیموكراتی كوردستان دەڵێ: هەر كاتێك سەربەخۆیی راگەینرا پێكهاتەكانی مەسیحی وەكو هەموو خەڵكی كوردستان بە ئاسوودەیی دەژین، چونكە چەندین خزم و كەسمان لە دەشتی نەینەوا هەن بەردەوام داواكاری ئەوان ئەوەیە بگەڕێنەوە سەر هەرێمی كوردستان بۆ ئەوەی لە زوڵم و زۆرداری حكوومەتی مووسڵ ڕزگار بن، بۆیە ئێمە وەك خەڵكی مەسیحی چاوەڕوانی 25/9 دەكەین بۆ ئەوەی بە بەڵێ دەنگی خۆمان بۆ سەربەخۆیی كوردستان و گەڕانەوەی ناوچەكانی خۆمان لە دەشتی نەینەوا بۆ سەر هەرێمی كوردستان بدەین.
(هورمز كلدۆ) هاووڵاتیەكی دیكەیە لە دیانا بۆ ماڵپەڕی فەرمی پارتی دیموكراتی كوردستان دەڵێ: 100% ئێمە لەگەڵ سەربەخۆیی كوردستانداین، چونكە ئەوە بە دەیان ساڵە ئێمە لێرە دەژین، هیچ كێشەیەكەمان نەبووە و زۆر بە ئاسوودەی لەگەڵ برا موسلمانەكان ژیاوین و حكوومەت و لایەنە پەیوەندیدارەكانیش هیچ درێغیان نەكردووە لە هاوكاری كردنی ئێمە، بۆیە دەمانەوێت هەر لەو خۆشیەدا بژین، ئەوەش بە ریفراندۆم و سەربەخۆیی كوردستان زیاتر بە دی دێت.
( هارون هورمز) ئەویش خەڵكی هەودیانە، بۆ ماڵپەڕی فەرمی پارتی دیموكراتی كوردستان دیار كرد، مەسیحییەكانی كوردستان و عێراق لەگەڵ ریفراندۆم و سەربەخۆیی كوردستانن، چونكە لە كوردستان مافی ئێمە پارێزراوە، پێشمەرگە قارەمانەكان لەسەر خاكی ئێمە لە دەشتی نەینەوا خوێنی خۆیان ڕشت و گیانی خۆیان بەخت كرد بۆ ئەوەی ناوچەكانی ئێمە ئازاد بكرێن و بگەڕێنەوە سەر هەرێمی كوردستان، بۆ ئەوەی بە ئازادی بژین و هەر لە خۆشیدا بین دەنگی خۆمان بە بەڵێ بۆ سەربەخۆیی كوردستان دەدەین".
.kdp-
