مەسعود بارزانی، سەرۆكی هەرێمی كوردستان، لە وتارێكیدا كە لە رۆژنامەی (واشنتۆن پۆست) لەژێر ناوی (ئێستا كاتی بڕیاردانە لەسەر سەربەخۆیی كوردستان) بڵاوی كردەوە، ئەو وتارەش بووەتە جێی بایەخی میدیاكانی توركیا.

بارزانی لە وتارەكەیدا ئاماژەی بەوە داوە كە 100 ساڵ بەرلە ئێستا بەڵێنیان دا كورد بكەن بە دەوڵەت، بەڵام بەسەر 4 وڵاتدا دابەشیان كردین، ئەمەی سەرەوە بەشێكی وتارەكەیە و سایتی (تی 24)ـی توركی وەكو مانشێت بەكاری هێناوە.

هەمان سایت وتارەكەی سەرۆکی هەرێمی کوردستانی كردووە بە توركی و هەموو ئەو دێڕانەشی وەكوو هەواڵ بەكار هێناوە كە پێیان گرنگ بووە.

جگە لە هەمان ماڵپەڕ، زۆربەی سایتەكانی دیكەی توركیاش بە هەمان شێوە گرنگیان بە وتارەكەی بارزانی داوە و باسیان لەوەش كردووە كە بارزانی دڵنیایی دەداتە وڵاتانی دراوسێ و دەوڵەتی كوردی نابێتە مەترسی بۆ سەر خاكی ئەوان."

تەلەڤزیۆنی (سی ئێن ئێن)ـی توركیش، باسی لە وتارەكەی سەرۆكی هەرێمی كوردستان كردووە كە لە (واشنتۆن پۆست) بڵاوی كردوەتەوە و دێر دێڕی وتارەكەی بە شێوەی نووسین بڵاو كردەوە و وەكوو راپۆرتێك بە گرنگییەوە باسیان لێوە كردووە.

هەریەك لە رۆژنامەی (بیرگون، تی 24، رۆژنامەی توركیا، سی ئێن ئێنی توركی، ئێن تی ڤی، تەقویم، بوگون، هەواڵی تی ڤی 5 ) بە گرنگییەوە باسیان لە وتارەكەی بارزانی كردووە.











باسنيوز