دوانیوەڕۆی ئەمڕۆ (سێشه‌ممه‌ 20/ 6/ 2017) لە شارەدێی ڕزگاری سەر بە کەلار، ئافرەتێک خۆی سوتاند، به‌و هۆیه‌شه‌وه‌ هاوسەرەکەی دەستگیرکرا.

مقه‌ده‌م لەمیعە محەمەد بەڕێوەبەری بەڕێوەبەرایەتی بەرەنگاربوونەوەی توندووتیژی دژ بەئافرەتان لەگەرمیان ڕاگەیاند :" ئەو ئافرەتەی خۆی سووتاندووە دانیشتووی شارەدێی ڕزگارییه‌ و خاوەن پێنج منداڵە".

ئافره‌ته‌كه‌ ناوى (ف،خ،ٲ)ـە و لەدایکبووی ساڵی 1971ـه‌.

مقه‌ده‌م له‌میعه‌، ڕوونی كرده‌وه‌، كه‌ ئافره‌ته‌كه‌ نه‌وتى به‌خۆیدا كردووه‌ و دواتر ئاگرى له‌ خۆى به‌رداوه‌.

گوتیشی:" به‌پێی زانیارییه‌كان، بەهۆی هەندێک کێشەی بچووک لەگەڵ مێردەکەی، ئافرەتەكه‌ پەنای بۆ خۆسووتاندن بردووە، جەستەی به‌ڕێژه‌ى 35% سووتاوە، به‌ڵام خۆشبەختانە لە ژیاندا ماوە".

ئاشكراشی كرد، كه‌ به‌بڕیارى دادوه‌ر و بەپێی ماددەی (408) لە یاسای سزادانی عێراقی، هاوسه‌رى ئافرەتەکە، دەستگیرکراوە.
bas news-