ڕێکخراوی داکۆکی لە مافی مرۆڤی کوردستان، بە بڵاوکردنەوەی راگەیەندراوێک پشتیوانی خۆی بۆ ڕێفراندۆم لە حکوومەتی هەرێمی کوردستان دەربڕیوە.




داوا لە بەرپرسانی باڵای حکوومەتی هەرێمی کوردستان، و لایەنە سیاسییەکان حیزبەکان کرراوە، هەرچی زووتر کۆتایی بە ناکۆکییەکانیان بهێنن و بۆ کاراکردنەوەی پەرلەمان وەک سەرچاوەی یاسادانان و پابەندبوون بە یاسا و پێشاندانی مەدەنیەت و دێموکراسی کوردستانی باشوور، هەنگاوی پێویست لەو بارەوە هەڵبگرن.



دەقی ڕاگەیەندراوەکە:



دیاریکردنی مافی چارەی خۆنووسین و مافی بەڕێوەبردنی ڕێفراندۆم و هەڵبژاردنی خودموختارانەی حاکمیەتی دەسەڵاتی سەربەخۆ و مافی سەرەتایی و بێ ئەملا و ئەولای خەڵکی کورد لە باشووری کوردستانە.



هەر قەوم و نەژاد و نەتەوەیەک خاوەنی مافی بنەڕەتی و گەرەنتیی دابینکردنی کەرامەت و بەرابەریی یەکسانی و ئازادییە کە دیاریکردنی ئەو مافە ئازادە دیاریکردنی بارودۆخی سیاسی، کۆمەڵایەتی، ئابووری و فەرهەنگی خودی حاکمیەتەکە، بە واتایەکی دیکە سەرەکیترین مافەکانی مرۆڤە کە بەشێک لە ماف و بەشێک لە ئازادییە سیاسی و مەدەنییەکان، کە خەڵکی هەر کۆمەڵگایەک لەو ڕێگایەوە بتوانن لە دیاریکردنی مافی سیاسی و کۆمەڵایەتی خۆیان، لە پێکهاتەی دەسەڵاتی سیاسی، لە بنیاتنانی دەسەڵاتی سیاسی، لە دروستکردنی قەوارەی پێویست بۆ بەڕێوەبردنی کاروباری کۆمەڵگەی خۆیان چاودێری بەسەر کار و کردەوەی بەرپرسانی حکوومەتی و دەوڵەتی، بەشداریی دێموکراتیکیان هەبێت.



لەو ڕووەوە خەڵکی کورد لە باشوور وەکوو قەوم و نەتەوەکانی دیکە دەبێ لە مافی دیاریکردن و بڕیاردان لە چارەی خۆنووسینی خۆیان ئیرادەیەکی ئازاد و هەڵبژاردنی خودموختارانە مافی سەڵاتی سەربەخۆیان هەبێ و گەرەنتیی دابینکردنی ئەو مافە دەبێت پشتیوانیی جیددی و هەمەلایەنەی خەڵکە ئازادیخواز و ئازادکراوەکانی جیهان و ویژدانە هەمیشە هوشیارەکانی جیهان لەخۆ بگرێت.



ڕێکخراوی دادکۆکی لە مافی مرۆڤی کوردستان، مافی دیاریکردنی چارەی خۆنووسین و مافی سەروەری و مافی بەڕێوەبردنی ڕێفراندۆم بۆ کردەییکردنی ئەو پرسە و بەتایبەت مافی بونیادی و حاشاهەڵنەگری خەڵکی باشووری کوردستان دەزانێت. ئەم ڕێکخراوە لەو باوەڕە دایە کە نەتەوەی کورد بە ئیرادەی ڕاستەقینەی خۆیان لە پرۆسەیەکی دێموکراتیک و لە ڕێگەی ڕێفراندۆمی ئازاد و دێموکراتیک و پابەند بە یاسا بە شێوازێکی تەواو ئاشتیخوازانە و بە مافی سەروەری و دەسەڵاتیان بەسەر چارەنووسی خۆیاندا هەبێت.



لەو ڕاستایەدا داواکارین بۆ دێموکراتیزەکردنی ئوسووڵی ژێرخانی پرۆسەی ڕێفراندۆم و پێشاندانی دێموکراتیکی هەڵبژاردنی خۆبەڕێوەبەڕیی دەسەڵاتی خەڵکی کوردستان لە باشوور، ڕێکخراوی مافی مرۆڤی کوردستان وەکوو ناوەندێکی مەدەنیی "ڕۆژهەڵات" داوا لە سەرۆک و بەرپرسانی باڵای حکوومەتی هەرێم، هەروەها بەرپرسانی حیزبەکان و ڕیکخراوە سیاسیەکانی هەرێم کوردستان دەکات، هەرچی زووتر کۆتایی بە ناکۆکیەکانیان بهێنن و بۆ کردنەوە و کاراکردنی دووبارەی پەرلەمان وەک سەرچاوەی یاسادانان و پابەندبوون بە یاسا و پێشاندانی مەدەنیەت و دیموکراسیی کوردستانی باشوور، هەنگاوی پێویست لەو بارەوە هەڵبگرن.



ئەو ڕێکخراوەیە لە کۆتاییدا، بەردەوامی، ئازادی و ئاشتی و سەرکەوتن بۆ خەڵکی کوردستان دەخوازێ.



ڕێکخراوی بەرگری لە مافی مرۆڤی کوردستان

1396/3/26ی هەتاوی

2017/6/16ی زایینی
bas news-