ئەندامی مەکتەبی سیاسیی یەکێتیی نیشتمانیی کوردستان رایدەگەیەنێت، کە سەرۆکی ئیستای پەرلەمانی کوردستان تەنیا یەک دانیشتنی دیکە سەرۆکایەتیی پەرلەمان دەکات.



رۆژی چوارشەممە 14.6.2017، سەعدی ئەحمەد پیرە، ئەندامی مەکتەبی سیاسیی یەکێتی لە کۆنگرەیەکی رۆژنامەوانیدا رایگەیاند، پەرلەمانی کوردستان بەهۆی کێشە ناوخۆییەکان و بە تایبەت کێشەی نێوان بزووتنەوەی گۆڕان و پارتی دیموکراتی کوردستان داخرا.



سەعدی ئەحمەد پیرە هەروەها رایگەیاند، کە لە کۆبوونەوەی سەرکردایەتیی حزبەکەی، چەند بڕیارێکیان داوە، کە بریتین لەمانە:





یەکەم/

یەکێتی تێدەکۆشێت بۆ ئەنجامدانی ڕیفراندۆم وەک تەنیا دەرگای یاسایی بۆ گەیشتن بە سەربەخۆیی کوردستان.



دووەم/

یەکێتی بۆ چارەسەرکردنی کێشە یاساییەکان ھەوڵی کاراکردنەوەی پەرلەمان دەدات.



سێیەم/

چارەسەرکردنی کێشەکان و یەکخستنی نەتەوەکەمان بۆ کۆدەنگیی نیشتمانی بۆ سەرخستنی پرۆسەی سیاسی لە هەرێمی کوردستان.



ئەو ئەندامەی مەکتەبی سیاسیی یەکێتی ئاماژەی بە کۆبوونەوەی مەسعود بارزانی، سەرۆکی هەرێمی کوردستان و حزب و لایەنە سیاسییەکانی کوردستان، (گۆڕان و کۆمەڵی ئیسلامی بەشدارییان تێدا نەکرد) کرد و رایگەیاند، لەوێ بڕیاری ئەنجامدانی ریفراندۆمی سەربەخۆیی و کاراکردنەوەی پەرلەمان درا.



سەعدی پیرە باسی کۆبوونەوەی رۆژی سێشەممە 13.6.2017ـی مەکتەبی سیاسیی پارتی و یەکێتی کرد و ”ئەم بڕیارانە دران“:



- پەرلەمان لە دانیشتنی یەکەمی دوای کاراکردنەوە، لە لایەن یوسف محەمەد بەڕێوە دەبرێت.

- لە دانیشتنی دووەمدا سەرۆک، جێگری سەرۆک و بڕیاردەرەکەی دەگۆڕدرێن، سەرۆکی تازەش ھەر لە بزووتنەوەی گۆڕان دەبێت.



- ھەموو ئەو بڕیارانەی لە کاری ڕۆژانە لەبارەی ئەجێندای کۆبوونەوەکان و وردەکارییەکانی دیکە دەدرێن، پێویستە بە تەبایی بدرێن.



- وەزیرەکانی گۆڕان، کە نێردرابوونەوە ماڵەوە، دەگەڕێنەوە سەر کارەکانی خۆیان وەک پێش ناکۆکییەکان.




باسنيوز