سەرۆک وەزیرانی هەرێمی کوردستان کە هاوکات جێگری سەرۆکی پارتی دیموکراتیی کوردستانە، ئەوەی ڕاگەیاند کە هەڵوێستی وڵاتان لەبارەی ڕیفراندۆم هەڵوێستێکی سرووشتییە.

لە میانی لێدوانێکی ڕۆژنامەوانیدا، ئەمڕۆ یەکشەممە 11/6/2017، نێچیرڤان بارزانی ڕای گەیاند، ئەو وڵاتانەی کە تاوەکوو ئێستا هەڵوێستیان لەبارەی ڕیفراندۆمەوە دەربڕیوە، هەڵوێستێکی ”سرووشتی“یان هەبووە.

لەبارەی هەڵوێستی هەریەک لە بزووتنەوەی گۆڕان و کۆمەڵی ئیسلامیی کوردستانیش ئەوەی ڕوون کردەوە کە ڕیفراندۆم ”بە تەنیا پرۆسەی هیچ حزب و لایەنێک“ نییە و ”پرۆسەی هەموو گەلی کوردستانە“. گوتیشی: ”لەگەڵ ئەو دوو لایەنە خەریکین، پێمان وایە ئەمە پرۆسەی کوردیش نییە بە تەنیا، بەڵکوو پرۆسەی کورد و تورکمان و مەسیحی و سەرجەم پێکهاتەکانی هەرێمی کوردستانە“.

جێگری سەرۆکی پارتی دیموکراتیی کوردستان ئەوەشی ئاشکرا کرد کە وەک پارتی، لە دوو ڕۆژی داهاتوودا لەگەڵ یەکێتیی نیشتمانیی کوردستان کۆبوونەوەیەک ئەنجام دەدەن.











باسنيوز