گوتەبێژی پارتی دیموکراتیی گەلان (ھەدەپە) لەبارەی بڕیاری ریفراندۆمی باشووری کوردستان، بۆ سەربەخۆیی، رای دەگەیەنێت کە "ئێمە پشتگیری لە بڕیاری خەڵکی باشووری کوردستان دەکەین".

عوسمان بایدەمیر، گوتەبێژی ھەدەپە و پەرلەمانتاری شاری روحا، دوێنێ لەکاتی رۆژوو شکاندن لە شاری ماردین، رای گەیاند: "برایانی ئێمە لە باشووری کوردستان، بە ئیرادەی خۆیان چ بڕیارێک بدەن، ئێمە رێز لە بڕیارەکانیان دەگرین".

گوتەبێژی ھەدەپە، جەختیشی لەوە کردەوە: "باشووری کوردستان، چ بڕیارێک بدەن، ئێمە پشتگیری ئەو بڕیارە دەکەین"

لەبارەی قسەکانی ئەنقەرەوە، کە رەخنەی لە بڕیاری ریفراندۆمی ھەرێمی کوردستان گرتبوو، بە بیانووی "ھەڵەیەکی گەورە و نەبوونی کاتی گونجاو بۆ ئەو پرسە"، بایدەمیر، ئەوەی خستەڕوو: "پەیامەکەی ئەنقەرە، لە زۆر توندە و لە جێگەی خۆی نییە، تورک، عەرەب و فارس، چ مافێکیان ھەیە، کوردیش ھەمان مافی ھەیە، نە زیاتر و نە کەمتر".

ئێوارەی رۆژی چوارشەممە 7/6/2017 مەسعود بارزانی، سەرۆکی ھەرێمی کوردستان، لەگەڵ لایەنە سیاسییەکانی ھەرێمی کوردستان کۆبوویەوە، بڕیار لەسەر رۆژی ئەنجامدانی ریفراندۆمی سەربەخۆیی کوردستان درا و رۆژی 25/9/2017 دیاری کرا.











باسنيوز