بارزانی: بەڕێوەچوونی ڕیفراندۆم بابەتێکی مێژووییە و یەکلاییبووەتەوە
ئەمڕۆ شەممە 10/6/2017 لە سەلاحەددین بە مەبەستی تاوتوێکردنی بڕیاری دیاریکردنی ڕۆژی بەڕێوەچوونی ڕیفراندۆم لە ھەرێمی کوردستانی عێراق و ناوچە کوردستانییەکانی دەرەوەی ئیدارەی ھەرێم، ھەروەھا ئاڵوگۆڕکردنی بیروڕا لەبارەی پڕۆسەی سیاسیی ھەرێمی کوردستان، نوێنەر و بەرپرسە باڵاکانی حزب و لایەنە سیاسییەکانی دەرەوەی پەرلەمان لەگەڵ مەسعود بارزانی، سەرۆکی ھەرێمی کوردستان کۆبوونەوە.
لەم کۆبوونەوەیەدا، ئامادەبووان دوای گفتوگۆیەکی چڕوپڕ و بە لەبەرچاوگرتنی بارودۆخی دەولی، ئەو قوربانیدان و ئەزموونانەی گەلی کوردستان لە خەباتی خۆیدا ھەیبووە، پشتگیریی تەواوی خۆیان بۆ پڕۆسەی ڕیفراندۆم و بڕیاری دیاریکردنی 25ـی ئەیلوولی 2017 بۆ ڕیفراندۆم ڕاگەیاند.
پارتە بەشداربووەکانی کۆبوونەوەکە جەختیان لەوە کردەوە کە ھەموو تواناکانیان بۆ سەرخستنی ڕیفراندۆم دەخەنەگەڕ، داوایشیان کرد کە نوێنەرەکانیان ڕۆڵیان لە کۆمیتە و کاروباری بەڕێوەچوونی ڕیفراندۆم ھەبێت.
سەرۆکی ھەرێمی کوردستان، ئەوەی بۆ ئامادەبووانی کۆبوونەوەکە ڕوونکردەوە کە بڕیاری بەڕێوەچوونی ڕیفراندۆم بابەتێکی مێژووییە و یەکلاییبووەتەوە و پەیوەستە بە ژیانی تاک بە تاکی خەڵکی کوردستان و ھیوایشی خواست ھەموو لایەک بە گڕوتینەوە بەشدار بن.
لایەنە بەشدار بووەکانی کۆبوونەوەکەش لەو پارت و لایەنانە پێکھاتبوون:
- یەکێتیی نەتەوەیی دیموکراتی کوردستان
- بزووتنەوەی دیموکراتی گەلی کوردستان
- پارتی نەتەوەیی کوردستان
- بزووتنەوەی ئاشتیخوازانی کوردستان
- پارتی پێشکەوتنخوازی دیموکراتی کوردستان
- بزووتنەوەی ڕزگاریی دیموکراتی کوردستان
- حزب بیت النھرین الدیموقراتی
- حزب الاتحاد الدیموقراتی الکلدانی
- سەرۆکی ئەنجوومەنی نەتەوەیی کلدان
- پارتی نیشتیمانی ئاشووری
- یەکێتیی بیت النھرینی نیشتیمانی
- مینبەری دیموکراتی کلدانی
- بزووتنەوەی دیموکراتی تورکمان
- بزووتنەوەی تورکمانی بێلایەن
- پارتی دیموکراتی تورکمانی کوردستان
- کۆمەڵەی ڕۆشنبیریی تورکمانن لە کوردستان
- پارتی گەلی تورکمان
- کۆمەڵەی لیبڕاڵی تورکمان
- پارتی ڕزگاری نەتەوەیی تورکمانی
باسنيوز
