ئەندامێکی سەرکردایەتیی کۆمەڵی ئیسلامیی کوردستان ڕای گەیاند، بە هەموو شێوەیەک پشتیوانی لە ڕیفراندۆمی سەربەخۆیی هەرێمی کوردستان دەکەن و هیواشی خواست کە زەمینەسازیی تەواو بۆ ئەو پرسە بکرێت.



ئه‌حمه‌د كه‌ركووكى، به‌رپرسى رێكخراوى مامۆستایانى ئیسلامىی كوردستان کە ڕێکخراوێکی سه‌ر به‌ كۆمه‌ڵى ئیسلامیى‌، ڕاگەیاند: "ئێمە بە هەموو شێوەیەک لەگەڵ ڕیفراندۆم داین، پێمان وایە دەبێت گەلی کوردستان لەو ڕێگایەوە بڕیار لە چارەنووسی خۆی بدات”.



ئەوەشی ڕوون کردەوە کە داوایان کردووە، زەمینەسازی بکرێت پێش ئەنجامدانی ڕیفراندۆم و لایەنەکان ئاشت بکرێنەوە و دەزگا شەرعییەکانی کوردستان دووبارە بخرێنەوە سەر ڕێڕەوی کاری خۆیان".





ئەو بەرپرسەی کۆمەڵی ئیسلامی جەختی لەوە کردەوە: “گرنگە ئەو لێژنەیەی دروستکراوە بۆ سەردانیکردنی لایەنەکان، بەتایبەت کۆمەڵ و گۆڕان، کاری خۆی بکات و ئەو زەمینەسازییە فەراهەم بکات بۆ ئەوەی لەو پرسەدا سەرجەم حزبەکان بڕیار لە چارەنووسی گەلی کوردستان بدەن”.






باسنیوز