لە کۆبوونەوەیەکدا لەگەڵ راوێژکاری ئەنجومەنی ئاسایشی هەرێمی کوردستان، جێگری وەزیری دەرەوەی هیندستان رایدەگەیەنێت، کە گەلی کوردستان دەوڵەتی تیرۆریستی داعشی تێکشکاند.

بەپێی راگەیەندراوێک، رۆژی چوارشەممە 7.6.2017، مەسرور بارزانی، راوێژکاری ئەنجوومەنی ئاسایشی ھەرێمی کوردستان لەگەڵ ئەممار سینھا، جێگری وەزیری دەرەوەی ھیندستان، باڵیۆزی هیندستان لە عێراق و کونسوڵی گشتیی ئەو وڵاتە لە هەولێر، کۆ بووەتەوە.

مەسرور بارزانی و ئەممار سینها تیشکیان خستووەتە سەر دوایین پەرەسەندنە سیاسی و سەبایەکان لە رۆژهەڵاتی ناوەڕاست و تاوتوێی چۆنێتیی بەهێزترکردنی پەیوەندییە سیاسی و ئابوورییەکانی هەولێر و نیودەلهی‌یان کردووە.

هەروەک لە راگەیەندراوەکەدا هاتووە، راوێژکاری ئەنجومەنی ئاسایشی هەرێمی کوردستان و جێگری وەزیری دەرەوەی هیندستان باسی شەڕی دژی تیرۆریان کردووە و ئەممار سینها وێڕای پیرۆزباییکردنی بەبۆنەی سەرکەوتنەکان لە پێشمەرگە و گەلی کوردستان، رایگەیاندووە، "لە راستیدا ئێوە بوون لەسەر زەوی نەک ھەر پێشڕەوییەکانی داعشتان وەستاند، بەڵکو پاشەکشەتان پێکرد و تێکتان شکاند".

شاندەکەی هیندستان باسیان لەوەش کردووە، کە وڵاتەکەیان گرنگیی بە پەیوەندییەکانی لەگەڵ هەرێمی کوردستان دەدا و نموونەی ئەو گرنگیپێدانەشیان بە "بەرزکردنەوەی ئاستی نوێنەرایەتی دیپلۆماتی"ی هیندستان لە ھەرێمی کوردستان هێناوەتەوە.

مەسرور بارزانی و ئەممار سینها هەروەها تاوتوێی رەوشی عێراقی دوای داعش و ھۆکارەکانی سەرھەڵدانی بیری توندڕەویی و "پێویستی بەڕێوەبردنی ھەڵمەتێکی فرەلایەن بۆ لەڕەگەوە چارەسەرکردنی تەواوی کێشە و ھۆکارەکان"یان کردووە.













باسنیوز