دەزگای خێرخوازیی بارزانی هاوکاریی هەژار و کەمدەرامەتەکانی سنووری شارەدێی کانی قرژاڵە لە نزیک هەولێر، دەکات.

بەپێی راگەیەندراوێک، رۆژی دووشەممە 5.6,2017، دەزگای خێرخوازیی بارزانی هاوکاریی 150 هەژاری سنوورەکەی کردووە.

ئەو کەسانە بژێویی ژیانیان لەسەر کۆکردنەوەی کەلوپەل لە ناو زبڵ و پاشماوەکان لە زبڵخانەی هەولێر، دابین دەکرد.

دەقی راگەیەندراوەکەی دەزگای خێرخوازیی بارزانی:

لە شارەدێی کانی قرژاڵە بە سەدان ھەژار و کەم دەرامەت بۆ بەدەست ھێنانی بژێوی ژیانیان سەرقاڵی کۆکردنەوەی خۆڵ و خاشاکن و بەمەبەستی ھاوکاری کردنیان دەزگای خێرخوازیی بارزانی کاروانێکی ھاوکارییەکانی گەیاندە ئەو شارەدێیە.

ئەمڕۆ رێکەوتی ٥/٦/٢٠١٧ دەزگای خێرخوازیی بارزانی بەبۆنەی مانگی رەمەزانی پیرۆزەوە کۆمەک و ھاوکارییەکانی گەیاندە ١٥٠ ھەژار کەلە شارەدێی کانی قرژاڵە سەرقاڵی کۆکردنەوەی خاشاکن بەمەبەستی بەدەست ھێنانی بژێوی ژیان.

جێگەی ئاماژەیە رۆژانە بە سەدان خێزان بژێوی ژیانیان بە کۆکردنەوەی زبڵ و خاشاک بەسەر دەبەن، دەزگای خێرخوازیی بارزانی لە مانگی پیرۆزیی رەمەزاندا، ھەڵمەتێکی بەرفراوانی بۆ ھاوکاریکردنی خەڵکانی لێقەوماو و ھەژار دەست پێکردووە، لەو ھەڵمەتەشدا دەست دەکرێت بە دابەشکردنی پارسێلی خۆراک بەسەر ئەو خێزان و کەسانەی کە لەو کۆمەڵگایانەدا سەرقاڵی کۆکردنەوەی زبڵ و خاشاکن.

سەرەڕای خراپی کەشوھەوا و لەناو بۆنێکی ناخۆشدا، ئەو خێزانانە ناچارانە بەدوای چنگ کەوتنی پارویەک ناندا لە ناو زبڵ و خاشاکدا دەگەڕێن و وەک یەکەم سەرچاوەی بژێوی ژیانیان لە کۆکردنەوەی پاشماوە فڕێدراوەکانی شاردا کاتیان بەسەر دەبەن.













باسنیوز